Ermənistan və Gürcüstanın Baş nazirləri əməkdaşlıq məsələlərini müzakirə ediblər

Poliqon xəbər verir ki, bu barədə Ermənistan hökumətinin mətbuat xidməti məlumat yayıb. Verilən məlumata görə, görüş zamanı liderlər Ermənistan və Gürcüstan arasında iqtisadi əməkdaşlıq üzrə hökumətlərarası komissiyanın bugünkü iclasının gündəliyi ilə bağlı məsələləri, eləcə də ikitərəfli siyasi və iqtisadi əlaqələrlə bağlı məsələləri müzakirə ediblər.

Tərəflər Ermənistan və Gürcüstan arasında əməkdaşlığın strateji xarakter daşıdığını qeyd edərək, hökumətlərarası komissiyanın bugünkü iclasının bütün sahələrdə ikitərəfli qarşılıqlı fəaliyyətə yeni təkan verəcəyinə əminliklərini ifadə ediblər.

Bu kontekstdə ticarət-iqtisadi əlaqələrin daha da inkişaf etdirilməsi və müxtəlif istiqamətlər üzrə birgə proqramların həyata keçirilməsi ilə bağlı məsələlərə baxılıb.

Regionda gedən proseslərlə bağlı fikir mübadiləsi aparılıb. Həmsöhbətlər sülh və sabitliyin bərqərar olması istiqamətində ardıcıl addımların atılmasının vacibliyini qeyd ediblər.

Poliqon.info