Kanada onlarla müasir döyüş pilotsuz uçuş aparatına (PUA) 2,49 milyard Kanada dolları (təxminən 1,9 milyard ABŞ dolları) xərcləyəcək...
Poliqon xəbər verir ki, bu barədə Kanada Müdafiə Nazirliyi məlumat yayıb.
"Kanada hökuməti Uzaqdan İdarə olunan Təyyarə Sistemlərinin (RPAS) alınmasına 2,49 milyard dollar sərmayə qoyacaq. Bu satınalma General Atomics Aeronautical Systems ilə birbaşa kommersiya müqaviləsi əsasında həyata keçiriləcək və bəzi fərdi komponentlər ABŞ hökumətinin Xarici Hərbi Təchizat Proqramı vasitəsilə alınacaq", deyə məlumatda bildirilir.
Qeyd edilir ki, yeni hərbi PUA-lar ölçüsünə görə qırıcı təyyarə ilə müqayisə olunacaq.
"Kiçik pilotsuz təyyarələrdən fərqli olaraq, RPAS pilotlu nəqliyyat vasitələrinin ciddi uçuş standartlarına uyğun olaraq hazırlanacaq və sertifikatlaşdırılacaq", deyə Müdafiə Nazirliyi vurğulayıb.
Ümumilikdə Kanada 11 pilotsuz təyyarə və onlar üçün bəzi döyüş sursatları, 6 yerüstü idarəetmə məntəqəsi, bir neçə təlim simulyatoru və müvafiq xidmətlər alacaq.
Pilotsuz təyyarələr Britaniya Kolumbiyası və Yeni Şotlandiya əyalətlərindəki hərbi bazalarda yerləşəcək və Ottavada mərkəzi yerüstü uçuş idarəetmə mərkəzi yaradılacaq. "İlk tədarük 2028-ci ildə, tam istismar gücünə yiyələnmək isə 2033-cü ilə qədər gözlənilir", deyə nazirlik vurğulayıb.
Poliqon.info