Qərbin talançılığı və yaxud Ukrayna Rusiyanın dondurulmuş aktivlərini ala biləcəkmi?

Siyasi-şərhçi: “Bildiyiniz kimi, G7 ölkələri həmin aktivləri öz istəklərinə görə blokdan çıxarıb Ukraynaya verə bilməz. Bütün bunlar beynəlxalq hüquq çərçivəsində və müəyyən şərtlər əsasında olmalıdır”.

“Heç kəsə sirr deyil ki, ABŞ və Qərb fors major hallarda, inqilablar və müharibə dövründə ölkələrin aktivlərini istədiyi kimi dondura və xərcləyə bilir”.

Bu sözləri siyasi-şərhçi Kamran Məmmədli dondurulmuş Rusiya aktivlərinin bir hissəsinin müsadirəsi məsələsini Poliqon-a şərh edərkən qeyd edib.

G7 ölkələrinin nümayəndələri dondurulmuş Rusiya aktivlərinin bir hissəsinin müsadirəsi ilə bağlı danışıqları intensivləşdiriblər. Bu barədə Britaniyanın Financial Times (FT) qəzeti yazıb. Nəşr bildirir ki, buna səbəb Aİ-nin Ukraynaya hələ də 50 milyard avronun ayrılması məsələsində qərara gələ bilməməsidir.

Rusiyanın dondurulmuş aktivlərinin Ukraynaya verilməsi beynəlxalq hüquqa nə qədər uyğundur və Aİ bu planını reallaşdırarsa, Qərb maliyyə qurumlarında aktivlərini saxlayan digər ölkələrin etimadını itirməzmi? Ümumiyyətlə, bu proses beynəlxalq maliyyə qurumlarında hansı nəticələr doğura bilər?

Mövzunu Poliqon-un əməkdaşı siyasi-şərhçi Kamran Məmmədli ilə müzakirə edib.

Kamran Məmmədli: “Hazırda dünya elə bir mərhələyə gəlib çıxıb ki, heç bir yerə tam etimad yoxdur”.

Son taxıl böhranından sonra dünyanın heç bir yerində etimadın olmadığını düşünən ekspert Poliqon-a açıqlamasında qeyd edib ki, kasıb Afrika ölkələrinə ayrılan taxılı, pandemiya zamanı maskaları oğurlayan Qərb ölkələrindən ədalət gözləmək sadəlövlük olar:

“Bildiyiniz kimi, G7 ölkələri həmin aktivləri öz istəklərinə görə blokdan çıxarıb Ukraynaya verə bilməz. Bütün bunlar beynəlxalq hüquq çərçivəsində və müəyyən şərtlər əsasında olmalıdır. Əsas argumentlərdən biri də Rusiyanın Ukraynaya vurduğu ziyana görə bu məbləği təzminat kimi ödəməsi ola bilər. Halbuki, 30 ildir Ermənistanın təcavüzü nəticəsində Azərbaycana dəymiş milyardlarla ziyanı görməməzlikdən gəlirlər.

O ki, qaldı, digər ölkələrin etimadını itirmək məsələsinə hesab edirəm ki, bu etimad çoxdan itirilib. Heç kəsə sirr deyil ki, ABŞ və Qərb fors major hallarda, inqilablar və müharibə dövründə ölkələrin aktivlərini istədiyi kimi dondura və xərcləyə bilir. Məsələn, Səddam Hüseynin ABŞ-da dondurulmuş 1 milyard dollarını Birləşmiş Ştatlar hökuməti müsadirə etmişdi və İraqda “Hüseyn rejimindən zərər çəkmiş amerikalılara” kompensasiya kimi ödəmişdi. Böyük Britaniya isə keçmiş Çili diktatoru Auqusto Pinoçetin pullarını donduraraq sonradan həmin pulları müxtəlif şirkətlərin nizamnamə kapitalına daxil edib və dövr etdirməkdədir. Yəni, bu ilk belə hadisə deyil.

Bu baxımdan hesab edirəm ki, dünya ölkələri bütün bunlardan dərs çıxarmalıdırlar. Hesab edirəm ki, hazırda dünya elə bir mərhələyə gəlib çıxıb ki, heç bir yerdə tam güvən yoxdur. Son taxıl böhranı bunun əyani sübutu oldu. Kasıb Afrika ölkələrinə ayrılan taxılı, pandemiya zamanı maskaları oğurlayan Qərb ölkələrindən ədalət gözləmək sadəlövlük olar”.

Nərminə UMUDLU
Poliqon.info