Əhali və iş adamları sığorta şirkətlərinə niyə inanmırlar? - Şərh

İqtisadçı-ekspert: “Sığorta şirkətlərinə inamın az olması uzun zamandır Azərbaycanda olan ciddi bir problemdir”.

“Güvənin zədlənməsinin əsas səbəbi vətəndaşların incidilməsi, zaman-zaman vaxtında ödənişlərin olmaması, vətəndaşların haqq etdikləri ödənişlərin zaman-zaman ala bilməməsidir”.

Bu sözləri iqtisadçı-ekspert Natiq Cəfərli Azərbaycanda sığorta şirkətlərinə olan güvənin olmamasının səbəblərini Poliqon-a şərh edərkən qeyd edib.

“Azərbaycan Sığortaçılar Assosiasiyası” və İcbari Sığorta Bürosu əhali, biznes subyektləri və iş adamları arasında sorğu keçirib. Sorğuya əsasən Azərbaycanda əhalinin və biznes subyektlərinin yarıdan çoxu sığortaya inanmır.

Azərbaycandakı sığorta sektorunun vəziyyətini necə dəyərləndirmək olar? Əhali və iş adamlarının sığorta şirkətlərinə inanmamasının səbəbləri nədir?

Ölkə sığorta şirkətləri ilə bağlı olan problemləri Poliqon-un əməkdaşı iqtisadçı-ekspert Natiq Cəfərli ilə müzakirə edib.

Natiq Cəfərli: “Sığorta şirkətlərinin əsas qayəsi və əsas hədəfi ondan ibarət olmalıdır ki, sosial roliklər, aksiyalar, pozitiv piar kampaniyalar vasitəsilə öz imiclərini düzəltsinlər və əhalidə etimad yaratsınlar”.

İnsanların sığorta şirkətləri ilə bağlı yaşadıqları problemlər simsiz telefon kimi bütün qohumlara, ətraflara yayıldığını bildirən ekspert Poliqon-a açıqlamasında qeyd edib ki, bu da sığorta şirkətlərinə olan etimadın azalmasına əsas səbəb olan əsas faktora çevrilir:

“Sığorta şirkətlərinə inamın az olması uzun zamandır Azərbaycanda ciddi bir problemdir. İnsanlar öz yaxın adamlarına, dostlarına, yaxınlarına, ətraflarına daha çox güvənirlər və zaman-zaman onların sığorta şirkətləri ilə bağlı yaşadıqları problemlər simsiz telefon kimi bütün qohumlara, ətrafa yayılır. Bu da sığorta şirkətlərinə olan etimadın azalmasına əsas səbəb olan əsas faktora çevrilir.

Sığorta şirkətlərinin əsas qayəsi və əsas hədəfi ondan ibarət olmalıdır ki, sosial roliklər, aksiyalar, pozitiv piar kampaniyalar vasitəsilə öz imiclərini düzəltsinlər və əhalidə etimad yaratsınlar.

Etimadın zədlənməsinin əsas səbəbi vətəndaşların incidilməsi, zaman-zaman vaxtında ödənişlərin olmaması, vətəndaşların haqq etdikləri ödənişləri vaxtında ala bilməməsidir. Bu kimi bir çox məsələlər var ki, bu da əhali və iş adamları arasında sığorta şirkətlərinə güvəni zəiflədib”.

Nərminə UMUDLU
Poliqon.info