Avstriya Ukraynanın Aİ-yə üzvlüyü ilə bağlı danışıqların başlanmasını dəstəkləmir

Avstriya Ukraynanın Avropa İttifaqına daxil olması ilə bağlı danışıqların başlanmasına qarşı çıxıb.

Poliqon xəbər verir ki, bu barədə federal kansler Karl Nehammer bildirib. Kansler bunu Kiyevin Bosniya və Herseqovinanın malik olmadığı imtiyazları alması ilə izah edib.

Karl Nehammer Respublika Milli Şurasının (parlamentin aşağı palatası) Avropa İttifaqı işləri üzrə komitəsi qarşısında çıxış edərək, müxalif Avstriya Azadlıq Partiyasının deputatlarına öz mövqeyini izah edib.

Kansler bildirib ki, Avstriya indiki şəraitdə Ukrayna ilə üzvlük danışıqlarına razı olmayacaq.

“Hazırda üzvlüklə bağlı danışıqlar aparan Bosniya və Herseqovina ilə müqayisədə Ukraynaya qarşı heç bir favoritizm olmamalıdır”, deyə Avstriya kansleri vurğulayıb. Nehammer hesab edir ki, Ukrayna və Moldovaya “həmrəylik əlaməti olaraq” Aİ-yə daxil olmaq perspektivi təklif edilməlidir, lakin kansler sürətləndirilmiş prosedura qarşı çıxıb.

Qeyd edək ki, noyabrda Avropa Komissiyası Ukrayna və Moldova ilə onların Aİ-yə daxil olması ilə bağlı danışıqlara başlamağın tərəfdarı olduğunu bildirib. Aİ liderlərinin dekabrda yekun qərar verəcəyi gözlənilir. Avropa Şurası etiraf edir ki, Ukraynanın üzvlük məsələsində ittifaqda yekdil fikir yoxdur. Macarıstan və Slovakiya hakimiyyəti buna açıq şəkildə qarşı çıxır.

Poliqon.info