Yaraqlılar Aşkelon, Sderot və Beerşeba şəhərlərini, həmçinin Qəzza şəhərinin şimal-qərbində İsrail əsgərlərini atəşə tutur...
Poliqon xəbər verir ki, HƏMAS-ın mətbuat xidməti Telegram kanalında İsrail Müdafiə Qüvvələrinə (IDF) qarşı hücumların başladığını elan edib. Eyni zamanda HƏMAS hərbi əməliyyatların başlanmasında İsraili günahlandırıb.
“Bir daha təsdiq edirik ki, öz torpaqlarında mətanətli xalqımız və qalib “Əl-Qəssam” Briqadalarının başçılıq etdiyi, indi bütün cəbhələrdə təcavüzə qarşı müqavimət göstərən və qəhrəmancasına əməliyyatlarını davam etdirən rəşadətli müqaviməti nəticəsində bu cinayətkar təcavüzün hədəflərinin qarşısı alınacaq”, deyə HƏMAS-ın bəyanında bildirilir.
Bundan əlavə, HƏMAS silahlıları bu gün, dekabrın 1-də Birləşmiş Ərəb Əmirliklərinin İsrail prezidenti İsaak Hersoqu BMT-nin iqlim dəyişikliyi ilə bağlı COP28 konfransına dəvət etmək qərarını pisləyən bəyanat yayıb. HƏMAS BƏƏ-ni “dost dövlət” olaraq dəvəti rədd etməyə çağırıb.
Qeyd edək ki, bu səhər İsrail və HƏMAS arasında atəşkəs başa çatıb və onun uzadılması ilə bağlı heç bir rəsmi açıqlama verilməyib. Səhər saatlarında İDF hava hücumundan müdafiə qüvvələrinin Qəzza zolağından atılan raketi vurduğunu açıqlayıb. Bundan sonra İDF HƏMAS-ı hərbi əməliyyatlardakı fasiləni pozmaqda ittiham edib və Qəzza zolağında döyüşləri bərpa edib.
İsrail və HƏMAS arasında danışıqlarda vasitəçi olan Qətər və Misir yeni atəşkəsə nail olmağa çalışır.
Poliqon.info