İsrail hakimiyyəti və HƏMAS silahlıları Qəzza zolağında saxlanılan girovların azad edilməsi üçün aparılan danışıqlarda irəliləyiş əldə ediblər...
Poliqon xəbər verir ki, bu barədə İsrailin “Yedioth Ahronoth” qəzeti məlumat yayıb. Nəşr danışıqlarda vasitəçi kimi çıxış edən Qətər rəsmilərinə istinad edir.
Nəşrin mənbələrinə görə, yaraqlılar ilk mərhələdə 4-5 gün davam edən hərbi əməliyyatlara fasilə verilməsi, həmçinin 150 fələstinli uşaq və qadının İsrail həbsxanalarından azad edilməsi və onların İsrailə verilməsi müqabilində 50 qadın və uşağı azad etməyə hazırdırlar. Bunun əvəzində HƏMAS Qəzzəyə yanacaq alacaq.
Qəzet yazır ki, HƏMAS yaraqlıları İsraildə oğurlanan bütün uşaqların və onların analarının harada olduğunu bilmədiklərini iddia edirlər. HƏMAS üzvü qeyd edib ki, İsrailin hava zərbələri endirməməsi şərti ilə atəşkəsin ilk günlərində onları tapmaq lazımdır. Yaraqlılar, həmçinin daha çox girovları tapacağı təqdirdə onları azad etməyə hazırdır.
Qeyd edək ki, noyabrın 18-də “The Washington Post” öz mənbələrinə istinadən yazıb ki, İsrail və HƏMAS ABŞ vasitəçiliyi ilə qadın və uşaqların azadlığa buraxılması üçün münaqişənin beş gün müddətinə dayandırılması barədə ilkin razılığa gəliblər. Bununla belə, Ağ Ev sözçüsü belə bir razılığın əldə olunmadığını bildirib.
İsrailə görə, HƏMAS 240-250 nəfəri girov saxlaya bilər. Onların əksəriyyəti İsrail vətəndaşları, 35-ə yaxını əcnəbidir.
Poliqon.info