Ağ Ev: ABŞ Tayvanı silahla təmin etməyə davam edəcək

Poliqon xəbər verir ki, bunu Ağ Ev yanında Milli Təhlükəsizlik Şurasının strateji kommunikasiyalar üzrə koordinatoru Con Kirbi bildirib.

Kirbi qeyd edib ki, son danışıqlar zamanı Amerika prezidenti Co Bayden Çin prezidenti Si Tsinpini Tayvan boğazında münaqişədən qaçmaq istəyinə əmin edib. Bayden həmkarını əmin etməyə çalışıb ki, Vaşinqton regionda sülhün və sabitliyin qorunmasına çalışır.

Eyni zamanda, Kirbi Amerika rəhbərliyinin “vahid Çin siyasəti”nə sadiqliyinə diqqət çəkib. Bu baxımdan ABŞ hakimiyyəti Tayvanın suveren dövlət statusu alacağı hadisələrin inkişafını dəstəkləmir.

“Lakin Tayvan Münasibətləri Aktı”na uyğun olaraq, biz Tayvana müdafiə imkanları verməyə davam edəcəyik” deyə Ağ Evin təmsilçisi əlavə edib.

Qeyd edək ki, noyabrın 15-də Co Bayden və Si Tsinpin arasında danışıqlar Amerikanın San Mateo qəsəbəsində baş tutub və əsas müzakirə mövzularından biri Tayvan boğazındakı gərgin vəziyyət olub. Xüsusilə də görüş zamanı Çin lideri amerikalı həmkarını Tayvanı müxtəlif hərbi texnika ilə təmin etməkdən imtina etməyə çağırıb.

Poliqon.info