Fələstinin radikal HƏMAS hərəkatı oktyabrın 7-də İsrail ərazisinə hücum zamanı əsir götürdüyü məhbuslarla bağlı heç bir məlumat verməyib, ona görə də İsrail dövləti onlar üçün döyüşmək məcburiyyətindədir...
Poliqon xəbər verir ki, bunu İsrail prezidenti İsaak Hersoq Financial Times nəşrinə müsahibəsində bildirib.
"Girovlarımızla bağlı bizə heç bir məlumat daxil olmayıb. Ona görə də mübarizə aparıb onları əldə etməli olacağıq", deyə İsrail prezidenti bildirib.
Oktyabrın 7-də HƏMAS "Əl-Əqsa tufanı" əməliyyatına başladığını elan edib və minlərlə HƏMAS yaraqlısının Qəzza zolağından İsrailə sızmasından sonra Yaxın Şərqdə vəziyyət gərginləşib. Buna cavab olaraq İsrailin baş naziri Benyamin Netanyahu ölkənin müharibə vəziyyətində olduğunu açıqlayıb.
İsrailin "Dəmir Qılınclar" əməliyyatının cavab məqsədi hücumu dəf etmək, xaricilər də daxil olmaqla 200-dən çox girovu azad etmək və HƏMAS-ı məhv etməkdir. Bu məqsədə çatmaq üçün İsrail əməliyyatın ilk günündən Qəzza zolağına kütləvi raket hücumları həyata keçirib. Eyni zamanda, İsrail Milli Təhlükəsizlik Şurası sektora su, ərzaq, mal, elektrik və yanacaq tədarükünün dayandırılmasına qərar verib. Qəzzaya humanitar yardımların çatdırılması yalnız oktyabrın 20-dən sonra Rəfah keçid məntəqəsi vasitəsilə həyata keçirilməyə başlayıb və onların həcmi qeyri-kafi adlandırılıb.
Poliqon.info