Gəncədə raket atılan evlər 3 ildir, niyə təmir edilmir? 

Belə ki, sosial şəbəkələrdə yayılan görüntülərdə Muxtar Hacıyev küçəsində yaşayan zərərçəkənlərin bəziləri bildiriblər ki, onların evləri hələ də təhvil verilməyib. Sakinlər fəsadların aradan qaldırılması üçün ayrılan dövlətin vəsaitinin aidiyyatı şəxslər tərəfindən mənimsənildiyini iddia edirlər.

Məsələ ilə bağlı Pravda.az-ın sorğusuna cavab olaraq Gəncə Şəhər İcra Hakimiyyətindən bildirilib ki, Nazirlər Kabinetinin 14.01.2021-ci il tarixli, 25s nömrəli Sərəncamı ilə 27 sentyabr 2020-ci il tarixindən etibarən Ermənistan Silahlı Qüvvələrinin Azərbaycana təcavüzü nəticəsində dəymiş ziyanın aradan qaldırılması ilə bağlı zərər vurulmuş obyektlərin tam bərpası və təmir-tikinti işlərinin həyata keçirilməsi üçün yaşayış evlərinin və obyektlərin tikintisi üzrə sifarişçi funksiyaları, habelə inşa prosesində həyata keçiriləcək işlərin təşkili və əlaqələndirilməsi Dövlət Şəhərsalma və Arxitektura Komitəsinə həvalə edilib.

“Ermənistan Silahlı Qüvvələrinin Gəncə şəhərini raket atəşinə tutması nəticəsində zərərçəkən sakinlərin Gəncə Şəhər İcra Hakimiyyətinə daxil olan müraciətlərində yer alan məsələlər birbaşa adıçəkilən komitəyə aid olduğundan, sözügedən müraciətlər aidiyyəti üzrə Dövlət Şəhərsalma və Arxitektura Komitəsinə yönləndirilir. Bununla yanaşı, mütəmadi olaraq, Gəncə Şəhər İcra Hakimiyyətinin təşəbbüsü ilə Gəncənin Ermənistan silahlı qüvvələri tərəfindən raket atəşinə tutulması nəticəsində zərərçəkən sakinlərlə Dövlət Şəhərsalma və Arxitektura Komitəsinin nümayəndələrinin, habelə podratçı şirkətlərin rəhbərlərinin görüşləri keçirilir, sakinlərin şikayət və təkliflərini dinlənilir”.

Poliqon.info