Netanyahunun müşaviri: Qəzzaya yanacaq tədarükünə icazə verməyəcəyik

Poliqon xəbər verir ki, Regev bu barədə CNN telekanalına bildirib. O, qeyd edib ki, Fələstinin HƏMAS hərəkatının girovları azad etməsi bu qərara belə təsir göstərməyəcək.

“Hazırda biz Həmas döyüş maşını üçün daha çox yanacaq almaqda maraqlı deyilik və onun tədarükünə icazə verməmişik. Dərman və su tədarükünə icazə verdik, həmçinin yeməyə icazə verdik, amma başqa heç nə yoxdu”, deyə Regev CNN-ə bildirib.

İsrail şübhə etmir ki, Qəzzaya yanacaq tədarük edilərsə, bu yanacaq HƏMAS tərəfindən oğurlanacaq və İsrailə raket atmaq üçün istifadə olunacaq. Baş nazirin məsləhətçisinin sözlərinə görə, əvvəllər Qəzza zolağına gətirilən yanacağın böyük hissəsi “oğurlanıb”.

BMT-nin Yaxın Şərqdəki Fələstinli Qaçqınlara Yardım və İşlər üzrə Agentliyi xəstəxanalarda yanacaq çatışmazlığının olduğunu dəfələrlə bəyan edib. Xəstəxanaların yanacaq ehtiyatları bir neçə günə tükənəcək.

Qeyd edək ki, oktyabrın 7-də HƏMAS-ın hücumuna İsrailin hərbi reaksiyası fonunda Qəzza zolağında humanitar vəziyyət daha da mürəkkəbləşib. Tərəflər müharibə vəziyyətindədir. İsrail anklavı blokadaya alıb və onun şimal hissəsindəki mülki əhalinin cənuba təxliyyə edilməsini tələb edib.

BMT-nin beş agentliyi Qəzzadakı vəziyyəti fəlakətli adlandırıb.

Poliqon.info