Oktyabrın 5-də İspaniyanın Qranada şəhərində keçirilən Avropa Siyasi Birliyinin üçüncü sammiti heç bir konkretlik olmadan başa çatıb...
Poliqon xəbər verir ki, bu barədə Politico nəşri yazıb. Nəşrin müşahidəçilərinin fikrincə, ilkin gözləntilərə baxmayaraq, meqa-sammit uğursuz olub.
“50 Avropa liderinin, onlarla köməkçinin və jurnalist legionunun iştirak etdiyi sammit Avropanın astanasında olan münaqişələrin və ya hər hansı digər regional problemin həllində heç bir əhəmiyyətli irəliləyiş əldə edə bilməyərək, nəticəsiz başa çatıb”, deyə Politco yazır.
Nəşr qeyd edib ki, forum çərçivəsində onlarla ikitərəfli görüşlər baş tutub, lakin bu, Kosovo ətrafında gərginliyin azaldılmasına və ya bu məsələlərdə əsas oyunçuların, xüsusən də Azərbaycan tərəfinin olmaması səbəbindən Ermənistan və Azərbaycan münasibətlərində təkan ola bilməyib. Nəşr əlavə edib ki, sonda İspaniya tərəfi əsas mətbuat konfransını lazımsız hesab etdiyi üçün onu tərk edib.
Sammitin nəticələrini şərh edən avropalı diplomatlardan biri nəşrə deyib: “Bu, mini BMT, liderlərin sövdələşmələr edə biləcəyi bazardır. Lakin uğursuz oldu”.
Qeyd edək ki, Azərbaycan Prezidenti İlham Əliyev Qranada sammitində Ermənistan, Almaniya, Fransa və Avropa Birliyi çərçivəsində görüşdən imtina edib. Buna səbəb Fransanın anti-Azərbaycan mövqeyi və Türkiyənin görüşə dəvət edilməsi olub.
Poliqon.info