Belçikanın baş naziri Aleksander de Kro Nyu-Yorkda keçirilən Baş Assambleyada almaz sənayesinin aparıcı nümayəndələrinə Rusiya qiymətli daşlarının bazardan çıxarılmasına dair planı təqdim edib...
Poloqon xəbər verir ki, bu barədə Belçikanın “Le Soir” nəşri məlumat yayıb.
Nəşrin məlumatına görə, rus daşlarının bazara daxil olmasının qarşısını almaq mexanizmi demək olar ki, hazırdır. Bununla belə, onun effektiv işləməsi və 2024-cü il yanvarın 1-dən fəaliyyətə başlaması üçün bütün aparıcı sənaye oyunçularının iştirakını təmin etmək lazımdır.
Yeni almaz izləmə protokolunun Kimberli Prosesi (münaqişə zonalarından kobud almazların dünya bazarlarına axınının qarşısını almaq üçün 2003-cü il sertifikatlaşdırma sistemi) daxil olmaqla bir neçə nəzarət mexanizminə əsaslanacağı gözlənilir. Mexanizm blokçeyn texnologiyası vasitəsilə təmin ediləcək. "Le Soir" qeyd edir ki, Belçikanın planı uğurlu olarsa, bu, rus daşlarının bazardan Afrika qitəsindən almazların xeyrinə yerdəyişməsinə səbəb olacaq.
"Le Soir"in belçikalı diplomata istinadən verdiyi xəbərə görə, Belçika rus almazlarından imtina planının hazırlanmasına rəhbərlik edir. Təsadüfi deyil ki, Belçikanın Antverpen şəhəri almazların ticarəti və emalı üzrə dünya mərkəzlərindən biridir.
Rusiya almazlarının qadağan edilməsi planının hazırlanmasında Avropa Komissiyası və ABŞ da iştirak edir. Məhdudiyyətlər 2024-cü il yanvarın 1-dən qüvvəyə minə bilər. G7 ölkələri qadağanı sentyabr-oktyabrın sonunda, Avropa İttifaqı oktyabr-noyabr aylarında elan edə bilər.
Poliqon.info