Aİ-yə üzv ölkələrin xarici işlər nazirləri Kiyevdə görüşəcək

Poliqon xəbər verir ki, bu barədə Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Cozep Borrel bildirib.

BMT Baş Assambleyasının 78-ci sessiyasında iştirak etmək üçün gəldiyi Nyu-Yorkda mətbuat konfransı zamanı Aİ diplomatiyasının rəhbəri deyib:

“Mən sizə deyə bilərəm ki, biz tezliklə Kiyevdə xarici işlər nazirlərinin görüşünü keçirəcəyik”.

Qeyd edək ki, İtaliyanın ANSA Agentliyinin bir gün əvvəl verdiyi məlumata görə, bu il oktyabrın əvvəlində Ukrayna paytaxtında Avropa İttifaqı ölkələrinin diplomatik departament rəhbərlərinin görüşü keçirilə bilər.

Həmçinin, Cosep Borrellin sözlərinə görə, bu həftə Nyu-Yorkda Avropa xarici işlər nazirlərinin qeyri-rəsmi görüşü keçiriləcək. Burada əsas diqqətin Qərbin Ukraynaya verə biləcəyi təhlükəsizlik zəmanətlərinə yönələcəyi gözlənilir.

“Biz Ukrayna qarşısında gələcək təhlükəsizlik öhdəliklərimiz haqqında danışacağıq, biz bunu artıq Toledoda müzakirə etmişik, orada bir neçə təklif irəli sürülüb”, deyə Borrel vurğulayıb.

Poliqon.info