Kuba hakimiyyəti insan alveri ittihamı ilə 17 nəfəri həbs edib. Onları ömürlük həbs gözləyə bilər...
Poliqon xəbər verir ki, bu barədə Reuters Agentliyi məlumat yayıb. Agentlik yerli hakimiyyət orqanlarına istinadən xəbər verir ki, saxlanılanlar Ukraynada döyüşmək üçün Rusiya ordusunda xidmət etmək üçün gənc kubalı kişiləri cəlb edən qrupla əlaqəli olublar.
Kuba Daxili İşlər Nazirliyinin polkovniki Sezar Rodriges Kuba televiziyasına açıqlamasında deyib ki, istintaq nəticəsində indiyədək 17 nəfər, o cümlədən qruplaşmanın təşkilatçısı həbs edilib.
Kuba Daxili İşlər Nazirliyinin polkovniki təqsirləndirilənlərdən heç birinin adını çəkməsə də, qrup rəhbərinin Rusiya tərəfində Ukraynaya qarşı döyüşlərdə iştirak etmək üçün gəncləri cəlb edən iki nəfərə arxalandığını bildirib.
Kuba prokuroru Xose Luis Reyes isə bildirib ki, həbs edilən şəxslər cinayətin şiddətindən və növündən asılı olaraq 30 ilə qədər həbs, ömürlük həbs və ya ölüm cəzasına məhkum edilə bilər.
Qeyd edək ki, Kuba hakimiyyəti sentyabrın 5-də Rusiya-Ukrayna hərbi münaqişəsində iştirak etmək üçün kubalıların cəlb edilməsi şəbəkəsinin müəyyən edildiyini bildirmişdi. May ayında Rusiyanın “Ryazan News” yerli portalı bir neçə kubalının müqavilə bağlayaraq Ukraynadakı döyüş bölgəsinə getdiyi barədə xəbər dərc etmişdi. Hazırda isə Ukraynada vuruşan kubalı muzdluların dəqiq sayı açıqlanmayıb. Nəşr qeyd edib ki, onlardan bəziləri daha sonra Rusiya vətəndaşı olmaq istəyirlər.
Reuters qeyd edir ki, Rusiya kommunist Kuba ilə güclü siyasi əlaqələri sayəsində evlərindəki iqtisadi durğunluqdan xilas olmaq istəyən kubalı miqrantlar üçün çoxdan sığınacaq yeri olub.
Poliqon.info
Digərxəbərlər
Populyar xəbərlər
