Şimali Koreya Xarici İşlər Nazirliyi Rusiya ilə tərəfdaşlığı gücləndirdiyini açıqlayıb...
Şimali Koreyanın xarici işlər naziri Çoy Son Hi rusiyalı həmkarı Sergey Lavrova Koreyanın yapon işğalından azad edilməsinin 78-ci ildönümü münasibətilə teleqram göndərib. Diplomat mesajında iki ölkə arasında strateji əməkdaşlığın və taktiki qarşılıqlı fəaliyyətin gücləndirilməsini vurğulayıb.
Poliqon xəbər verir ki, bu barədə avqustun 16-da Şimali Koreyanın Mərkəzi Xəbər Agentliyi məlumat yayıb.
Çoy Son Hi KXDR ilə Rusiya arasında əməkdaşlığın gələcəkdə də fəal şəkildə inkişaf edəcəyinə əminliyini ifadə edib. O, respublikanın Yaponiyanın müstəmləkəçiliyindən azad edilməsində Qırmızı Ordu əsgərlərinin göstərdiyi yardımı xatırladıb.
Nazirin sözlərinə görə, KXDR və Rusiya “çətin vaxtlarda” həmişə bir-birini dəstəkləyir və iki ölkə liderləri Vladimir Putin və Kim Çen Inın 2019-cu ildə Vladivostokda baş tutan görüşündən sonra iki ölkə arasında münasibətlər yeni çiçəklənmə dövrünü yaşayır.
Qeyd edək ki, bir gün əvvəl Rusiya prezidenti Putin və Şimali Koreya lideri Kim Çen In qarşlıqlı olaraq bir-birlərinə təbrik teleqramı göndərib.
Poliqon.info