Rusiya Xarici İşlər Nazirliyinin nümayəndəsi bildirib ki, Ermənistan və Azərbaycan Moskvanın deeskalasiya ilə bağlı təkliflərini “ev tapşırıqları kimi” qəbul ediblər...
Ermənistan və Azərbaycan heç bir şərtlə sülh müqaviləsi bağlamağa hazır deyillər, tərəflər hələ də bəzi çətin məsələləri həll etməlidirlər.
Poliqon xəbər verir ki, bu barədə avqustun 4-də Rusiya Xarici İşlər Nazirliyinin MDB ölkələri üzrə dördüncü departamentinin direktoru Denis Qonçar TASS Agentliyinə müsahibəsində deyib.
“Bakıdan və İrəvandan onların sülhün mümkün qədər tez əldə edilməsinə sadiqlikləri barədə siqnallar o demək deyil ki, tərəflər istənilən şərtlərlə razılaşmağa hazırdır”, deyə Qonçar bildirib.
Qonçarın sözlərinə görə, iki ölkə arasında sülhün bərqərar olmasına mane olan ən mühüm problem təhlükəsizliyin təmin edilməsi, eləcə də Bakının qanun çərçivəsində Qarabağ ermənilərinin hüquqlarının təminat altına alınması məsələsidir.
Rusiya XİN nümayəndəsi əlavə edib ki, Rusiya tərəfi sülh müqaviləsinin hazırlanmasında Ermənistan və Azərbaycana fəal kömək edir. O, qeyd edib ki, belə bir sazişin hazırlanması Rusiya rəhbəri, Azərbaycan prezidenti və Ermənistanın Baş naziri arasında üçtərəfli sazişlərin elementlərindən biridir.
Qonçar həmçinin bildirib ki, Ermənistan və Azərbaycan regionda gərginliyin azaldılması üçün Rusiyanın təkliflərini “ev tapşırıqları kimi” qəbul ediblər.
“İyulun 25-də Moskvada Rusiya, Azərbaycan və Ermənistan xarici işlər nazirləri səviyyəsində son təmaslar Dağlıq Qarabağda son dərəcə çətin vəziyyət fonunda baş tutub. Həssas detalları açıqlamadan deyə bilərəm ki, gərginliyin azaldılması üçün kompromis həll yolları təklif edilib”, deyə Qonçar bildirib.
“Moskva ümid edir ki, insanlar üçün qayğı və humanitar mülahizələr Yerevan və Bakı arasında siyasi fikir ayrılıqlarını üstələyəcək”, deyə Rusiya XİN rəsmisi əlavə edib.
Qeyd edək ki, Rusiya XİN rəsmisinin bu açıqlamaları Moskvanın Bakı ilə İrəvan arasında sülhün əldə olunmasında heç də maraqlı olmadığından xəbər verirlir və bu, artıq Rusiya rəsmiləri tərəfindən açıq şəkildə etiraf olunur.
Poliqon.info