BMT-nin Baş katibi Antonio Quterreş Kremldən Rusiya kənd təsərrüfatı bankının törəmə şirkətinin SWIFT-ə qoşulması müqabilində “taxıl sazişi”ni uzatmağı xahiş edir...
Poliqon xəbər verir ki, bu barədə Reuters Agentliyi üç mənbəyə istinadən məlumat yayıb.
Bildirilir ki, “Rosselxozbank”ın SWIFT beynəlxalq ödəniş şəbəkəsinə yenidən qoşulması Rusiyanın “taxıl müqaviləsi”nin uzadılması ilə bağlı əsas tələbi olub.
“Rosselxozbank” 2022-ci ilin iyununda Rusiyanın Ukraynaya müdaxiləsinə görə Avropa İttifaqı tərəfindən SWIFT-dən çıxarılıb. Aİ may ayında bildirmişdi ki, blok Rusiya banklarının bərpası məsələsini nəzərdən keçirmir.
Bununla belə, Aİ Rusiya taxıl və gübrə ixracı ilə bağlı sövdələşməni təmin etmək üçün “Rosselxozbank”ın törəmə şirkətini SWIFT-ə qoşmağı düşünür.
Agentliyin həmsöhbətlərinin sözlərinə görə, Quterreş Putinə “taxıl müqaviləsi”ni bir neçə ay uzatmağı təklif edərək, Aİ-yə “Rosselxozbank”ın törəmə təşkilatını SWIFT-ə qoşmaq üçün vaxt verib.
BMT nümayəndəsi Stefan Dujarrik də öz növbəsində jurnalistlərlə söhbətində qeyd edib ki, Quterreş çərşənbə axşamı Putinə məktub göndərib və Rusiyanın ərzaq və gübrə ixracını daha da asanlaşdırmaq və Qara dəniz boyunca Ukrayna taxılının davamlı tədarükünü təmin etmək yollarını təklif edib.
“Məqsəd Rusiya Federasiyası üçün ciddi narahatlığa səbəb olan “Rosselxozbank” vasitəsilə maliyyə əməliyyatlarına təsir edən maneələri aradan qaldırmaq və eyni zamanda Qara dəniz vasitəsilə Ukrayna taxılının ixracının davam etdirilməsini təmin etməkdir”, deyə Düjarrik bildirib.
O, təkliflə bağlı təfərrüatları açıqlamayıb, lakin əlavə edib ki, Quterreş məsələ ilə bağlı bütün əlaqədar tərəflərlə əlaqə saxlayır və təklifini Rusiya ilə müzakirə etməyə davam etməyə hazırdır.
Poliqon.info