ABŞ-ın 44-cü prezidenti Barak Obama CNN telekanalına müsahibəsində Qərb ölkələrinin 2014-cü ildə Ukraynada “ilk işğalın” qarşısını almaq üçün yetərincə iş görməməsi ilə bağlı tənqidi bəyanatları şərh edib...
Poliqon xəbər verir ki, Obamanın fikrincə, Krımın Rusiyaya birləşdirilməsi orada çoxlu sayda rusdilli əhalinin yaşaması və Rusiyanın öz maraqlarını təmsil etməsində maraqlı olması ilə bağlıdır.
Jurnalist Kristian Amanpur qeyd edib ki, 2014-cü ildə Krım Rusiyanın tərkibinə daxil olanda Barak Obama ABŞ prezidenti vəzifəsini icra edib. Bununla əlaqədar olaraq o, Obamanın Qərb ölkələrinin, o cümlədən Almaniyanın Krımın Ukraynadan ayrılmasının qarşısını almaq üçün “kifayət qədər qırmızı xətlər çəkməməsi” ilə bağlı iddialarla razı olub-olmadığını soruşub.
“O dövrün Ukraynası bu gün haqqında danışdığımız Ukrayna deyil. Krıma silahlı müdaxilənin olmamasının səbəbi isə orada çoxlu rusdillilərin olması və Rusiyanın onların maraqlarını təmsil etməsinə müəyyən rəğbətin olması idi. O vaxt Ali Radada hələ də Rusiya tərəfdarları çox idi. Həm mən, həm də Angela Merkel (Almaniyanın keçmiş kansleri) sanksiyalar tətbiq etmək və Putinin Donbassda hərəkətini davam etdirməsinə mane olmaq üçün çoxlu avropalıları "təpikləyərək", qışqıraraq bizə tərəf çəkməli olduq".
Obama qeyd edib ki, zaman keçdikcə ukraynalılarda “Rusiyadan ayrı bir şəxsiyyət” hissi, Rusiyaya qarşı durmaq əzmi və həm hərbi, həm də mülki cəhətdən hazırlaşmaq bacarığı formalaşıb.
Poliqon.info