Almaniya kansleri Olaf Şolts hesab edir ki, Qərb ölkələri Rusiya-Ukrayna hərbi münaqişəsi şəraitində uzun müddət Kiyevə kömək etməli olacaqlar. Kansler Aİ üzvlərini buna hazırlaşmağa çağırıb...
Poliqon xəbər verir ki, bu barədə Almaniya kansleri İtaliyanın Corriere della Sera qəzetinə müsahibəsində danışıb.
“Biz hərbi əməliyyatların nə vaxt bitəcəyini bilmirik... Ona görə də biz hələ uzun müddət Ukraynaya kömək etməli olacağımıza hazırlaşmalıyıq. Biz ədalətli və davamlı sülhə nail olmaqda Ukraynanı dəstəkləyəcəyik. Bu məqsədlə biz Ukrayna və dünyanın bir çox başqa ölkələri ilə intensiv mübadilələr aparırıq”, deyə kansler bildirib.
Şoltsun sözlərinə görə, hazırda Aİ-də Ukraynanı dəstəkləmək zərurəti ilə bağlı tam birlik var.
“Bu gün Qərbin Ukraynaya özünü müdafiə etməyə kömək etməsi və bundan sonra sülh danışıqlarına töhfə verməsi vacibdir. Əsas məqsəd ədalətli sülh və çoxlu əzab və dağıntılar gətirən bu dəhşətli müharibəyə son qoymaqdır”, deyə Şolts vurğulayıb. Siyasətçi əlavə edib ki, Qərb Ukraynaya həm döyüş meydanında, həm də danışıqlar masası arxasında məqsədlərinə çatmaqda kömək edəcək.
Poliqon.info