Gömrük Komitəsinin “aeroport əməliyyatı” etiraz yaratdı – Böyük narazılıq

Bu gün Azərbaycan Respublikası Dövlət Gömrük Komitəsi Heydər Əliyev Beynəlxalq Hava Limanında İstanbul-Bakı aviareysi ilə gələn Azərbaycan Respublikası vətəndaşına məxsus əl yüklərinin yoxlaması zamanı gömrük orqanına şifahi, yazılı və ya elektron qaydada bəyan edilməyən brend geyim əşyaları, “Cartier” markalı qol saatı, zərgərlik məmulatları və digər mallar aşkar olunduğu barədə məlumat yayıb.

Globalinfo.az xəbər verir ki, gömrük orqanlarında rəhbər dəyişikliyindən sonra bu cür “yeni qərarlar” sərt təpkilərə səbəb olub.

Belə ki, bu gün hava limanında saxlanılan əşyaların siyahısı insanlarda narazılıq yaradıb və hətta tanınmış rəsmi nümayəndələr də öz hesablarında etirazlarını nümayiş etdiriblər.

Azərbaycan Mətbuat Şurasının İdarə Heyətinin üzvü, “Yeni Çağ” Media Qrupunun rəhbəri Aqil Ələsgər və Azərbaycan Vəkillər Kollegiyasının üzvü, tanınmış vəkil Elçin Sadıqovun etirazlarını olduğu kimi təqdim edirik.

Aqil Ələsgər: “Gələn gedənə rəhmət oxudur” atalar sözü Dövlət Gömrük Komitəsində özünə həyat tapıb. Keçən dəfə yazmışdım ki, aeroport gömrükçüləri Səfərbalanın (Dövlət Gömrük Komitəsinin keçmiş sədri Səfər Mehdiyev-red.) zamanında çantaları yoxlayırdılar, indi isə ciblərimizə girirlər.

Artıq insanların alt paltarlarına uzanacaq qədər “inkişaf ediblər”.

Bəlkə də bunların abırını Səfərbala örtürmüş, qədrini bilmədik…” 

Elçin Sadıqov: “Səfər Mehdiyev obyekti belə işlətmirdi. Adamın əxlaqı var idi. Heyf, xalqın cibindən getdi. Bunlar lap ağını çıxarıblar.
Nazirlər Kabinetinin 305 saylı qərarına əsasən şəxsi və yaxın qohumların istifadəsi üçün gətirilən mallar dəyərindən və miqdarından asılı olmayaraq gömrük rüsumlarından azaddırlar”.

Poliqon.info bildirir ki, DGK-nin xaricdən gələn Azərbaycan vətəndaşları ilə bu rəftarı sosial şəbəkələrdə böyük narazılığa səbəb olub. Onlarla tanınmış şəxs gömrük işçilərinin insanlarla bu cür rəftarını sərt tənqid ediblər.

Redaksiya ittihamlarla bağlı Dövlət Gömrük Komitəsinin mövqeyini dərc etməyə hazırdır. 

Poliqon.info