Neft embarqosu Rusiyanı Çin və Hindistanın girovuna çevirib

PİA.az xəbər verir ki, bu barədə BBC-nin məlumatında bildirilir.

Rusiya artıq bir aydan çoxdur ki, Qərbin Rusiya neftinə qoyduğu embarqo və qiymət tavanı altında yaşayır. BBC qeyd edir ki, məhdudiyyətlər Rusiya xammalının qiymətinin kəskin azalmasına səbəb olub və Moskvanı Çin və Hindistandan, Rusiya yanacağının ən böyük idxalçılarından asılı vəziyyətə salıb.

Dekabrın 5-də Rusiya xam neftinin Aİ bazarına tankerlərlə tədarükünə embarqo qüvvəyə minib. Elə həmin gün də Qərb Rusiyadan “qara qızıl”ın barreli üçün 60 dollar səviyyəsində qiymət limiti tətbiq edib və müəyyən edilmiş bu qiymət həddi keçdildyi halda Rusiya neftinin daşınmasını və sığortalanmasını qadağan edib. Məhdudiyyətlər Rusiya neft və broker xidmətləri ilə yüklərin sığortası üzrə qiymətlərin artmasına səbəb olub.

Bundan əlavə, Rusiya xammalının çatdırılması xərcləri artıb, çünki indi Asiya onun üçün əsas bazara çevrilib. Bu xərclər satış şərtlərinə daxil edilmir və alıcı ölkə tərəfindən ödənilir, bu isə o deməkdir ki, Rusiya sonuncu alıcılarını itirməmək üçün endirimlər etməyə məcburdur. Beləliklə, endirimlərin köməyi ilə son istehlakçıya qədər uzun yolun xərcləri kompensasiya edilir.

“Sanksiyalar Rusiyanı daha yüksək qiymətlər formalaşdırmaq və bazarda öz qaydalarını qurmaq imkanından məhrum edib. Əksinə, Çin və Hindistan kimi Rusiya neftinin böyük alıcıları öz şərtlərini diktə edə bilirlər və Rusiya onlarla razılaşmaq məcburiyyətində qalacaq”, deyə Arikapital Management Company-nin investisiya strateqi Sergey Suverov bildirib.

Belə reallıqlarda artıq ən yaxşı dövrlərdən uzaq olan Rusiya büdcəsi daha bir neçə trilyon rubl itirmək riski ilə üzləşir.

Bu arada Rusiya neft hasilatı bu ilin əvvəlində sutkada 500-700 min barel azala bilər.

pia.az