Ermənistan və Azərbaycan arasında delimitasiya və sərhəd təhlükəsizliyi komissiyasının üçüncü iclasının Moskvada deyil, Brüsseldə baş tutması nədən xəbər verir?..
Politoloq: “Azərbaycan və Ermənistan arasında sərhədlərin delimitasiya və demarkasiyasinin iclasının Brüsseldə keçirilməsində əsas məqsəd Moskvanı prosesdən kənar tutmaqdır”.
“Təbii ki, Rusiya yenidən belə bir iclası Moskvada çağıra bilər. Amma, bu kimi görüşləri təkrar təşkil etmək Moskva üçün sadəcə prosesi pozmaq məqsədi daşıyır”.
Bu sözləri politoloq Məhəmməd Əsədullazadə bu gün Brüsseldə Ermənistan və Azərbaycan arasında keçirilməsi gözlənilən komissiya görüşünü PİA.az-a şərh edərkən qeyd edib.
Bu gün Brüsseldə Ermənistan və Azərbaycan arasında delimitasiya və sərhəd təhlükəsizliyi komissiyasının üçüncü iclası keçiriləcək. Bu görüşdən nəticə baxımından ümidverici nəticə gözləmək olar? Xüsusilə Rusiya sərhədlərin müəyyənləşməsi üçün xəritələr təklif etdiyi halda, görüşün Moskvada deyil, Brüsseldə baş tutması nədən xəbər verir?
Mövzunu PİA.az-ın əməkdaşı Cənubi Qafqaz Təhlükəsizlik və Sülh İnstitutunun sədri, politoloq Məhəmməd Əsədullazadə ilə müzakirə edib.
Məhəmməd Əsədullazadə: “İki ölkə 1991-ci il Alma Atı müqaviləsini rəhbər tutubsa, burada heç Rusiyanın xəritəsinə də ehtiyac yoxdur”.
Brüssel formatının ən uyğun bir danışıqlar platforması olduğunu düşünən politoloq PİA.az-a bildirib ki, Bakı və İrəvan artıq Moskvaya etimad etmir:
“Azərbaycan və Ermənistan arasında sərhədlərin delimitasiya və demarkasiyasinin iclasının Brüsseldə keçirilməsində əsas məqsəd Moskvanı prosesdən kənar tutmaqdır. Çünki Kreml növbəti hədəfdə bundan istifadə edərək iki ölkə arasında sülh müqaviləsinin bağlanmasına imkan verməz. Xəritə oyunu ilə prosesi sabotaj edər. İki ölkə 1991-ci il Alma Atı müqaviləsini rəhbər tutubsa, burada heç Rusiyanın xəritəsinə də ehtiyac yoxdur. Ona görə də Brüsseldə keçirilən görüşdə müsbət nəticə olmasa da, görüşün məhz Brüsseldə təşkil olunması irəliyə doğru addımdır.
Təbii ki, Rusiya yenidən belə bir iclası Moskvada çağıra bilər. Amma, bu kimi görüşləri təkrar təşkil etmək Moskva üçün sadəcə prosesi pozmaq məqsədi daşıyır. Brüssel formatı ən uyğun bir danışıqlar platformasıdır və tərəflər bir-birlərinin mövqelərini yaxınlaşdıra bilərlər. Bakı və İrəvan artıq Moskvaya etimad etmir.
Nikol Paşinyan bunu Rusiyanın mövqeyinin güclənməsi kimi görür. Öz hakimiyyətinə təhlükə sayır. Azərbaycanda Kremlin sülhdə maraqlı olmadığını bilir. Ona görə də Rusiyanin vasitəçiliyi iki tərəf üçün maraqlı deyil”.
Nərminə UMUDLU
pia.az