Venesuela prezidenti Nikolas Maduro “yaxın aylarda” İrana səfər edəcək. İranın "Mehr" agentliyi xəbər verir ki, bu barədə iki ölkənin xarici işlər nazirləri Hüseyn Əmir-Abdollahian və Feliks Plasencia arasında dünən Tehranda keçirilən ortaq mətbuat konfransında deyilib.
“İki ölkə arasında 20 illik əməkdaşlıq yol xəritəsini tərtib edəcəyik. Önümüzdəki aylarda Venesuela prezidenti Tehrana səfər edəcək və biz həmin sənədi imzalayacağıq. Onu da qeyd edim ki, İran mallarının Venesuela xalqı üçün əlçatanlığının təmin ediləcəyi bir mərhələdəyik. İrana investisiyalar üçün imkanlar da qurulur, təfərruatlar tədricən açıqlanacaq ", - Abdollahian bildirib.
"İranla Venesuela arasındakı əlaqələr strateji xarakter daşıyır və bu ilin sonuna qədər Tehranda birgə komissiyanın iclasını keçirə biləcəyimizi bildirməkdən məmnunam. Beynəlxalq hüquqa hörmətə və tolerantlıqa əsaslanaraq sizinlə birlikdə bir gələcək qurmaq istəyirik", - Venesuelanın XİN başçısı Feliks Plasencia öz növbəsində deyib.(virtualaz.org)
pia.az