Misir Türkiyə ilə münasibətlərin bərpası üçün şərtlərini açıqladı

Rəsmi Qahirə Ankaranın iki ölkə arasındakı münasibətləri yaxşılaşdırmaq istiqamətindəki səylərini alqışlayıb

Misir Türkiyə ilə münasibətləri normallaşdırmağa başlamağa hazırdır.

Oxu.Az RİA Novosti-yə istinadən xəbər verir ki, bu barədə Misir Xarici İşlər Nazirliyinin (XİN) bəyanatında bildirilir.

Sənədə əsasən, prosesin başlanğıc nöqtəsi kimi Misirin eks-prezidenti Məhəmməd Mursinin hakimiyyətdən kənarlaşdırılmasının legitimliyini tanımaq tələb edilir.

Misir XİN-in nümayəndəsi rəsmi Ankaranın Qahirə ilə münasibətləri yaxşılaşdırmaq istiqamətindəki səylərini alqışladığını qeyd edib.

“Misir xalqının 2013-cü il iyunun 30-da göstərdiyi iradənin (Məhəmməd Mursinin hakimiyyətdən kənarlaşdırılmasına gətirib çıxaran kütləvi aksiyalar nəzərdə tutulur) və ölkəyə rəhbərliyi öz üzərinə götürmüş iqtidarın legitimliyinin qəbul edilməsi vacibdir. Bu tanınma Türkiyə-Misir münasibətlərinin inkişafı üçün başlanğıc nöqtəsi olacaq”, - deyə bəyanatda vurğulanıb.

Xatırladaq ki, Türkiyənin baş naziri Binəli Yıldırım Aralıq və Qara dəniz sahillərindəki bütün qonşu ölkələrlə, o cümlədən Misirlə münasibətləri normallaşdırmaq niyyətində olduqlarını bildirib.

pia.az