Fransa prezidenti Emmanuel Makron Orta Asiya turnesini Özbəkistana səfəri ilə yekunlaşdıracaq...
Fransa prezidenti Emmanuel Makron Özbəkistana dövlət səfərinə başlayır və bu, Mərkəzi Asiya turnesinin yekunu olacaq.
Poliqon xəbər verir ki, bu barədə TASS Agentliyinin məlumatında bildirilir. Nəşr yazır ki, bu, Fransua Mitteranın 1994-cü ildə Özbəkistana səfərindən sonra, son 30 ildə Fransa liderinin Özbəkistana ilk səfəridir. Lakin Özbəkistan prezidenti Şavkat Mirziyoyev iki dəfə - 2018 və 2022-ci illərdə Fransaya səfər edib.
Mirziyoyevin ötən ilin noyabrında Parisdə olduğu müddətdə iyirmidən çox əməkdaşlıq sazişi imzalanıb. Onlar bərpa olunan enerji mənbələrinin inkişafı, şəhər idarəetməsi və nəqliyyatla bağlı olub. Tərəflər kənd təsərrüfatı sahəsində əməkdaşlıq haqqında da razılığa gəliblər.
Yelisey sarayının nümayəndələrinin sözlərinə görə, Daşkənddəki danışıqlar zamanı Makron əməkdaşlığın daha da dərinləşdirilməsi, o cümlədən iqtisadi və enerji əməkdaşlığı, həmçinin 30-a yaxın fransız şirkətinin artıq fəaliyyət göstərdiyi Özbəkistanda Fransanın mövcudluğunun genişləndirilməsi barədə razılığa gəlmək niyyətindədir.
Fransa liderinin Özbəkistana bu səfəri çərçivəsində onu 60-a yaxın aparıcı müəssisənin rəhbərləri müşayiət edir. Həmçinin əməkdaşlığın əsas istiqamətləri üzrə bir neçə müqavilənin imzalanması planlaşdırılır.
Ötən ay Fransa və Özbəkistan sərmayələrin təşviqi və qorunması üçün hökumətlərarası saziş imzalayıb. Fransa tərəfi həmçinin Daşkəndin su təchizatı sisteminin modernləşdirilməsində iştiraka böyük əhəmiyyət verir. Fransanın SUEZ şirkəti yeddi il ərzində bu məsələ ilə bağlı proqram həyata keçirməyi planlaşdırır.
Qeyd edək ki, Fransa lideri Qazaxıstandan Özbəkistana gedir və orada prezident Kasım-Jomart Tokayevlə danışıqlar aparıb. Dövlət başçıları iqtisadi əlaqələrin inkişafına diqqət yetiriblər.
Poliqon.info