Macarıstan Ukraynaya yardım və silah vermək əvəzinə, Avropa Sülh Fondundan aldığı vəsaiti Afrika ölkəsi Çadın müdafiəsinə dəstək üçün köçürməyi planlaşdırır...
Poliqon xəbər verir ki, bu barədə Macarıstanın xarici işlər naziri Peter Siyarto mətbuat konfransı zamanı bildirib. "Biz bu 14 milyon avronu Çadda təhlükəsizliyi gücləndirmək, Çadda ordu zabitlərini hazırlamaq və Çad silahlı qüvvələrinin imkanlarını artırmaq üçün yeni təhsil müəssisəsi yaratmaq məqsədi ilə istifadə etmək qərarına gəldik", deyə XİN başçısı bildirib. Telex nəşrinin məlumatına görə, Siyarto belə bir təklifin sentyabrın 26-da Avropa İttifaqının Daimi Nümayəndələr Şurasında müzakirə olunacağını qeyd edib. "Macarıstan təklifi Aİ Səfirləri Komitəsinin sentyabrın 26-da keçirilməsi nəzərdə tutulan iclasının gündəliyinə daxil edilib və ümid edirik ki, bu təklif qəbul olunacaq", deyə siyasətçi əlavə edib. Nəşr əlavə edib ki, Çad prezidenti Mahamat Debinin başçılıq etdiyi nümayəndə heyətinin iki günlük səfəri zamanı Macarıstan qeyri-qanuni miqrasiyaya qarşı mübarizə, müdafiə və kənd təsərrüfatı sahəsində bir sıra sazişlər imzalayıb. Daha əvvəl Peter Siyarto bəyan etmişdi ki, Rusiyadan Macarıstana neft nəqli Ukraynada iddia edilən hüquqi problemlər səbəbindən dayanıb: "Hazırda Ukraynada hüquqi vəziyyət yaranıb və bunun əsasında "Lukoyl" Macarıstana neft vermir. Biz hüquqi həll yolu üzərində işləyirik". Həmçinin, macar diplomat hesab edir ki, Ukraynada sülh şansı yalnız Donald Trampın ABŞ-da keçirilən prezident seçkilərində qələbəsindən sonra yaranacaq. Onun sözlərinə görə, Macarıstan NATO və Avropa üçün Rusiyadan təhlükə görmür, çünki Kreml rasionaldır və Qərblə silahlı qarşıdurmaya cəsarət etməyəcək.
Poliqon.info
Digərxəbərlər
Populyar xəbərlər
