Kiyev meri Vitali Kliçko bu gün Ukrayna paytaxtını tərk edib
Virtualaz.org yerli KİV-ə istinadən bildirir ki, Kliçkonun hansı istiqamətdə uçduğu bəlli olmayıb.
Kliçkonun təyyarədə çəkilmiş görüntülərini jurnalist İrina Kasparova paylaşıb.
“Dünya çempionu ilə göyərtədə. Məzuniyyət üçün əla başlanğıc”, - deyə Kasparova bildirib.
Qeyd edək ki, bir müddət əvvəl Ukrayna Prezidenti Vladimir Zelenskinin Kiyev meri Vitali Kliçkonu istefaya göndərməyi planlaşdırması ilə bağlı məlumat yayılmışdı. Kliçko da açıqlamasında Kiyev meri vəzifəsindən azad ediləcəyi təqdirdə, avropalı tərəfdaşlarına müraciət edəcəyini bildirmişdi: “Mən məhkəmə instansiyalarına, avropalı tərəfdaşlarımıza müraciət edəcəyəm. Əgər biz demokratik dövlət qurmaq istəyiriksə, vətəndaşların fikirlərinə laqeyd qalmağımız doğru deyil”.
Onu da qeyd edək ki, Kiyev şəhərinin meri seçki ilə seçilir və onun vəzifədən çıxarılması mümkün deyil. Kiyev meri yalnız təzyiqlərlə istefa ərizəsi yaza və yaxud hansısa cinayət işinə cəlb edildiyi halda vəzifə səlahiyyətlərinə xitam verilə bilər.
pia.az