İtaliyanın xarici işlər naziri Qəddafinin öldürülməsini Afrikada qeyri-sabitliyin səbəbi adlandırıb...
İtaliyanın xarici işlər naziri Antonio Tayani 2011-ci ildə Liviya lideri Müəmmər Qəddafinin öldürülməsinin Qərb dövlətləri tərəfindən atılan ciddi səhv addım olduğunu bildirib.
Poliqon xəbər verir ki, bu barədə ANSA Agentliyinin məlumatında bildirilir. Nazir bildirib ki, Liviya dövlət başçısının ölümü Afrikada siyasi qeyri-sabitliyin artmasına səbəb olub.
“Ola bilsin ki, Qəddafi demokratiya çempionu olmayıb, amma o, öldürülən kimi Liviyada və ümumilikdə Afrikada siyasi qeyri-sabitlik yaranıb”, deyə italyan diplomat bildirib.
Qeyd olunur ki, Tayani dəfələrlə Qəzzafinin öldürülməsini tənqid edib. 2022-ci ildə o, bu hadisənin Aİ ölkələrində miqrasiya böhranının güclənməsinin səbəblərindən biri olduğunu bəyan edib. Bundan başqa, Qəddafinin öldürülməsi Afrika və Yaxın Şərqdə fəaliyyət göstərən bir sıra terror təşkilatlarının güclənməsinə səbəb olub.
Qeyd edək ki, Müəmmər Qəddafi Liviyanın keçmiş rəhbəridir və ölkəni 42 il idarə edib. 2011-ci ildə bir sıra hökumət əleyhinə çıxışlardan sonra o, hakimiyyətdən uzaqlaşdırıldı. Həmin ilin oktyabrında Qəddafi Sirte şəhəri yaxınlığında öldürüldü.
Poliqon.info