ABŞ və BMT-nin baş katibi İsraili İordan çayının qərb sahilindəki mülki insanları qorumağa çağırıb...
Amerika prezidenti Co Baydenin administrasiyası İsraili İordan çayının qərb sahilində mülki insanları qorumaq üçün bütün mümkün tədbirləri görməyə çağırıb.
Poliqon xəbər verir ki, bu barədə ABŞ Dövlət Departamentinin İsrailin “The Times of Israel” qəzetinə verdiyi açıqlamada bildirilir.
Dövlət Departamentindən bildiriblər ki, onlar İsrailin təhlükəsizlik ehtiyaclarını, o cümlədən İordan çayının qərb sahilində terror fəaliyyətinə qarşı mübarizə ehtiyacını qəbul edirlər.
“Biz həmçinin İordan çayının qərb sahilində sabitliyin qorunması ilə bağlı dərin narahatlığımızı davam etdiririk və İsraili İordan çayının qərb sahilindəki mülki insanların həyatını qorumaq üçün bütün mümkün tədbirləri görməyə çağırırıq”, deyə sənəddə vurğulanır.
BMT-nin baş katibi Antonio Quterreş də İsrailin hərəkətlərini pisləyib və İordan çayının qərb sahilində baş verən ölümlərlə bağlı dərin narahatlığını ifadə edib. Bu barədə baş katibin sözçüsü Stefan Dujarrik bildirib. Quterreş həmçinin İsraili beynəlxalq humanitar hüquqa hörmət etməyə və İordan çayının qərb sahilində mülki insanları qorumaq üçün tədbirlər görməyə çağırıb.
Qeyd edək ki, bir gün əvvəl İsrail Müdafiə Qüvvələri İordan çayının qərb sahilindəki Cenin və Tulkərm şəhərlərində terrorla mübarizə əməliyyatına başladığını elan edib. “The Times of Israel” nəşrinin məlumatına görə, İsrailin keçirdiyi əməliyyat nəticəsində azı 11 nəfər ölüb, 26 nəfər yaralanıb.
Poliqon.info