İsrailin BMT-dəki daimi nümayəndəsi Qilad Erdan Maltanın Qəzza zolağı ilə bağlı BMT Təhlükəsizlik Şurasının qəbul etdiyi qətnaməni reallıqdan uzaq adlandırıb...
Poliqon xəbər verir ki, bu barədə Qilad Erdan X sosial şəbəkəsində yazıb.
Qeyd edək ki, BMT Təhlükəsizlik Şurası Maltanın təqdim etdiyi Qəzza zolağında uşaqların müdafiəsi probleminə diqqət yetirən qətnamə qəbul edib. 12 ölkə bu qətnamənin lehinə səs verib. ABŞ, Böyük Britaniya və Rusiya bitərəf qalıb. Rusiyanın dərhal atəşkəsə çağıran düzəlişi layihəyə daxil edilməyib.
Qətnamədə BMT Təhlükəsizlik Şurası bütün tərəflərdən mülki şəxslərin, xüsusilə də uşaqların müdafiəsi ilə bağlı beynəlxalq hüquq çərçivəsində öhdəliklərə əməl etməyi tələb edir.
Erdan hesab edir ki, BMT Təhlükəsizlik Şurasının qətnaməsi mənasızdır və reallıqdan uzaqdır. İsrailin daimi nümayəndəsi vurğulayıb ki, Təl-Əviv Təhlükəsizlik Şurasının qərarlarından asılı olmayaraq “beynəlxalq hüquqa uyğun” hərəkət etməyə davam edəcək.
Poliqon.info