İran Rusiyaya ballistik raketlər satarsa, beynəlxalq ictimaiyyət tez cavab verəcək

İran Rusiya-Ukrayna müharibəsində istifadə etmək üçün Rusiyaya ballistik raketlər satarsa, ABŞ və müttəfiqləri sərt tədbirlər görmək niyyətindədir.

Poliqon xəbər verir ki, bu barədə ABŞ Dövlət Departamentinin mətbuat xidmətinin rəhbəri Miller bildirib.

“Bu, İran və Rusiya arasında dərinləşən hərbi tərəfdaşlığın daha bir əlamətidir, belə ki, biz dəfələrlə bu tərəfdaşlığın Ukrayna, İranın qonşuları və beynəlxalq ictimaiyyət üçün zərərli olduğunu açıq şəkildə xəbərdar etmişik”, deyə Millerin bəyanatında deyilir.

Dövlət Departamenti rəsmisinin sözlərinə görə, ABŞ Rusiya ilə İran arasında hərbi tərəfdaşlığa qarşı hərəkətə keçmək və cavab vermək bacarığını nümayiş etdirib.

Miller, tərəfdaşları və müttəfiqləri ilə sıx koordinasiyaya da diqqət çəkib.

“Əgər İran irəliləyərək Rusiyaya ballistik raketlər satarsa, sizi əmin edə bilərəm ki, beynəlxalq ictimaiyyət buna tez cavab verəcək”.

Poliqon.info