Eskobarın begemotları və “yoxa çıxmış xəzinə”si barədə film çəkilir

“HaberGlobal”ın məlumatına görə, “Cocaine Hippos” (Kokain Begemotları) adlı film Eskobarın xəzinəsinin arxasınca düşən dostların məzəli hekayəsindən bəhs edəcək.

Pablo Eskobar 80-ci illərdə kərgədanlardan tutmuş zürafələrə, fillərdən tutmuş begemotlara qədər ölkəsində yaşamayan bir çox heyvanları Kolumbiyaya gətirtdib, özünə məxsus ərazidə zoopark qurdurub.

Eskobar 1993-cü ildə təhlükəsizlik qüvvələri tərəfindən öldürüldükdən sonra bu heyvanlar Kolumbiya və xaricdəki zooparklara və özəl parklara göndərilib. Yalnız dörd begemotdan başqa...

Olduqca qəzəbli olan heyvanları yaxalamaq təhlükə yaradırdı. Buna görə də onlara toxunulmur və heyvanlar Eskobarın torpağında yaşamağa davam edir.

İndi isə həmin begemotların hekayəsindən bəhrələnərək yeni bir film çəkiləcək. “Netflix” üçün çəkiləcək “Cocaine Hippos” filmi Eskobarın “yoxa çıxmış xəzinəsi”nin arxasınca düşən dostların müxtəlif cinayətkarlar, narkotik tacirləri və begemotlarla yaşadıqları macəraları ekranlaşdıracaq.

Mövzudan göründüyü kimi “Cocaine Hippos” “The Hangover” və “Tropic Thunder” kimi komediya xarakteri daşıyacaq.

Filmin ssenarisini Cordan Vandinanın yazacağı, baş rolu isə Jermen Foulerin ifa edəcəyi gözlənilir.

Eskobarın begemotlarının sayı bu gün 80-ə çatıb. Hələ də narkobaronun keçmiş ərazisi və ətrafında yaşayırlar. Aktivistlərin fikrincə, bu heyvanlar bölgənin ekoloji sistemi üçün böyük təhlükə təşkil edirlər.

pia.az