Samvel Şahramanyan: “Dağlıq Qarabağ Respublikası”nın ləğvi ilə bağlı sənədin heç bir hüquqi qüvvəsi yoxdur...
““Artsax”a qayıtmaq bizim hüququmuzdur və bu, Ermənistanın dövlət maraqlarına əngəl ola və ya zidd ola bilməz”.
Poliqon xəbər verir ki, bunu Qarabağı könüllü tərk edən erməni separatçılarının lideri Samvel Şahramanyan bu gün, sentyabrın 2-də jurnalistlərlə söhbətində deyib.
“Ermənistana köçdükdən sonra biz bir siyasət qəbul etdik və mən bu barədə bütün “Artsax” rəsmilərinə məlumat verdim ki, Ermənistanın təhlükəsizliyi bizim üçün prioritetdir. Ermənistan da vətənimizin əsas hissəsidir və biz Ermənistan hakimiyyətinin apardığı prosesləri təhlükəyə atmamalı və onun təhlükəsizlik sisteminə zərər verməməliyik. Amma biz görürük ki, müxtəlif səbəblərdən “Artsax”ın buraxılması məsələsi manipulyasiya predmetinə çevrilir. Bu yalan tezisdir. İmzalamaq məcburiyyətində qaldığımız bu sənəd mülki əhalinin təhlükəsiz şəkildə Ermənistana köçürülməsinə imkan verdi”, deyə Şahramanyan imzadığı sənədi şərh edərkən jurnalistlərə bildirib.
Şahramanyan qeyd edib ki, o, imzaladığı sənəd konstitusiyaya zidd və qanunsuz olduğunu əvvəlcədən bilib. Separatçı qeyd edib ki, hüquqi qüvvəyə minməmiş, rəsmi dərc edilməmiş, hüquq sisteminə daxil edilməyən bir sənədi normativ akt adlandırmaq olmaz.
“Əhalinin fikrini bilirik. Əhali Azərbaycana inteqrasiya etmək istəməyib və vətənini tərk etmək qərarına gəlib. Biz bu sənədlə bağlı qərar qəbul etmişik. Mən bu qərarla bağlı Baş nazirin timsalında Ermənistan hökumətini yazılı şəkildə xəbərdar etmişəm. Bu sənədin etibarlı olması barədə danışmaq mənasızdır və reallığa uyğun gəlmir”, deyə Şahramanyan əlavə edib.
Separatçı xatırladıb ki, son onilliklərdə Ermənistan hakimiyyəti Qarabağ ermənilərinin adından danışıqlarda iştirak edib.
“Biz hesab edirik ki, “Artsax” məsələsini beynəlxalq gündəmə qaytarmaq Ermənistan hakimiyyətinin vəzifəsidir. Biz bütün maraqlı strukturlarla bu məsələni müzakirə etməyə hazırıq. Biz müxtəlif formatlarda danışıqlara hazırıq. Ən əsası odur ki, düzgün tapşırıq və format formalaşdırılsın və qoyulsun”, deyə Şahramanyan vurğulayıb.
Qeyd edək ki, Azərbaycan prezidenti İlham Əliyev dəfələrlə Ermənistan rəhbərliyinə separatizmi və Azərbaycana qarşı ərazi iddalarını müdafiə etməməklə bağlı xəbərdarlıq edib. Prezident vurğulayıb ki, bunun Ermənistan üçün ağır nəticələri ola bilər.
Poliqon.info