Ərdoğanın 12 ildən sonra İraqa səfər edəcək

Türkiyə Xarici İşlər Nazirliyi İraq tərəfi ilə prezident Rəcəb Tayyib Ərdoğanın İraqa gözlənilən səfərini müzakirə edir.

Poliqon xəbər verir ki, bu barədə jurnalistlərə Bağdadda səfərdə olan Türkiyə xarici işlər nazirinin müavini Əhməd Yıldız məlumat verib.

“Sabah İraq Xarici İşlər Nazirliyində həmkarlarımızla görüşlər keçirəcək və ikitərəfli əlaqələri müzakirə edəcəyik. Biz yaxın gələcəkdə baş tutacaq xarici işlər nazirlərinin görüşünə, eləcə də prezidentimizin İraqa səfərinə hazırlıq görəcəyik”, deyə TRT telekanalı Yıldızın sözlərindən sitat gətirib. Diplomat qeyd edib ki, söhbət Ərdoğanın aprelin sonuna qədər İraqa səfərindən gedir.

“Plana əsasən, səfər aprelin sonuna qədər baş tutacaq. Sonuncu dəfə prezidentimiz, o vaxt Baş nazir olaraq İraqa 2012-ci ildə səfər etmişdi. O vaxtdan bəri İraq rəhbərliyinin Ankaraya səfərləri olub, amma dövlət səviyyəsində deyil. İndi belə bir səfərin vaxtı çatıb”, deyə Yıldız bildirib.

Qeyd edək ki, Ərdoğanın Bağdada səfəri İraqın şimalında yeni sərhədyanı hərbi əməliyyat ehtimalı ilə bağlı Ankaranın sərt ritorikasının fonunda baş verir. Türkiyə liderinin özü daha əvvəl bəyan etmişdi ki, bu yay İraqla sərhəd təhlükəsizliyi məsələsi həll olunacaq. Ehtimal olunur ki, əməliyyatın məqsədi İraqın şimal rayonlarını 40 km dərinliyə qədər Türkiyədə qadağan olunmuş Kürdüstan Fəhlə Partiyasının (PKK) silahlılarından təmizləmək olacaq. İraq rəhbərliyinin Türkiyəyə müəyyən dəstək verməyə razı olduğu iddia edilir.

Poliqon.info