Davosda Qəzzanın bərpası ən azı 15 milyard dollar qiymətləndirilib

Fələstin İnvestisiya Fondunun rəhbəri Məhəmməd Mustafa Davosda keçirilən Dünya İqtisadi Forumunda İsrailin Qəzza zolağında vurduğu zərbələr nəticəsində dağılan evlərin bərpası üçün ən azı 15 milyard dollar tələb olunacaq.

Poliqon xəbər verir ki, bu barədə Reuters Agentliyi məlumat yayıb.

Məhəmməd Mustafanın sözlərinə görə, Qəzza zolağında İsrail hərbi əməliyyatları başlayandan bəri 350 minə yaxın evə ziyan dəyib və ya tamamilə dağılıb.

“Onlardan 150,000-nin hər birinin orta hesabla 100,000 dollara yenidən tikilməli olduğunu fərz etsək, bu, 15 milyard dollarlıq mənzil xərcləridir. Biz hələ infrastrukturdan danışmırıq, zədələnmiş xəstəxanalardan, rabitədən danışmırıq”, deyə Fələstin İnvestisiya Fondunun rəhbəri deyib.

Reuters qey edir ki, İsrailin 2014-cü ildə həyata keçirdiyi və təxminən iki ay davam edən “Dayanıqlı Qüvvət” əməliyyatından sonra Qətər Qəzzaya yardım üçün 1 milyard dollardan çox vəsait xərcləyib.

Yanvarın 15-də İsrailin müdafiə naziri Yoav Qalant bildirib ki, İDF zolağın şimal hissəsində intensiv döyüşlər mərhələsini başa vurub və tezliklə Qəzzanın cənubunda da eyni şeyi etməyi planlaşdırır.

Poliqon.info