Çinin xarici işlər naziri Fələstin dövlətinin yaradılmasına çağırıb

Poliqon “The Times of Israel” qəzetinə istinadən xəbər verir ki, Van İ Qahirədə misirli həmkarı Sameh Şükri ilə keçirdiyi mətbuat konfransında müvafiq açıqlamalar verib. İki nazirin birgə bəyanatında həmçinin mülki əhaliyə və mülki obyektlərə qarşı bütün zorakılıq, qətl və hücumlara dərhal son qoyulması tələb olunur.

Çinin xarici işlər naziri Van İ Qəzza zolağında müharibənin genişlənmədə davam etdiyini vurğulayıb.

Çinli dipıomat münaqişənin bütün regiona yayılmasının qarşısını almaq üçün daha geniş, daha nüfuzlu və effektiv beynəlxalq sülh konfransı keçirməyə və iki dövlət həllinin həyata keçirilməsi üçün konkret vaxt cədvəli yaradılmasına çağırıb.

“1967-ci ildə qəbul edilən qərara əsasən paytaxtı Şərqi Qüds olan müstəqil sərhədlərə malik tam suveren Fələstin dövlətinin yaradılmasında israr etmək lazımdır”, deyə Van İ bildirib.

Çinin xarici işlər naziri həmçinin bildirib ki, Qəzza zolağında münaqişə günahsız mülki insanlar arasında böyük itkilərə səbəb olur və bu da ciddi humanitar fəlakətlər yaradır. O, qeyd edib ki, Qəzza zolağının infrastrukturu tamamilə dağılıb, milyonlarla insan sağ qalmağa çalışır.

Qeyd edək ki, Van İ hazırda Afrika ölkələrinə turne səfərindədir. Səfər zamanı nazir Misirdən başqa Toqo, Tunis və Kot-d'İvuara da səfər edəcək.

Poliqon.info