Böyük Britaniyanın hakim Mühafizəkarlar Partiyasının bəzi deputatları müxalifətin artan populyarlığı fonunda hakimiyyətdə qalmaq ümidi ilə hökumət başçısı Rişi Sunakın parlament seçkilərinə qədər istefasına nail olmağı gözləyirlər...
Poliqon xəbər verir ki, bu barədə Böyük Britaniyanın Times qəzeti məlumatlı mənbələrə istinadən yazıb.
Mənbənin sözlərinə görə, 10-a yaxın parlamentari Rişi Sunakın baş nazir postundan uzaqlaşdırılması üçün səylərə başlayıb. Rişi Sunakdan narazı olan Tori millət vəkilləri inanırlar ki, fevral ayında İcmalar Palatasına iki seçki dairəsi üzrə əlavə seçkilərdə hakim partiya qaçılmaz məğlubiyyətə uğrayacaq.
Bundan başqa, onların fikrincə, Mühafizəkarlar Partiyası may ayında keçiriləcək yerli seçkilərdə də uğursuzluqla üz-üzədir. Odur ki, narazıların cəmi üç ay vaxtı var və qalan Mühafizəkar deputatları da Rişi Sunaka qarşı etimadsızlıq göstərməyə razı salmağa və Mühafizəkarlar Partiyasının yeni liderinin, həm də ölkə hökumətinin gələcək rəhbərinin seçilməsi prosesinə başlamağa çalışacaqlar.
Poliqon.info