Azərbaycanda tütün əkini sahələrinin azalmasının səbəbi açıqlanıb

Azərbaycandakı tütün emalı müəssisələrinin yerli xammala tələbatı azalıb.

Bunu Kənd Təsərrüfatı Nazirliyinin Bitkiçiliyin təşkili və monitorinqi şöbəsinin müdiri İmran Cümşüdov bildirib.

Onun sözlərinə görə, bu, tütün əkini sahələrinin də azalmasına səbəb olub: "Əgər 2021-ci ildə ölkədə 3 100 hektar sahədə tütün əkilmişdisə, 2022-ci ildə bu rəqəm 2 431 hektar olub. Çünki, emal müəssisələrinin sifarişləri azalıb. Nazirlik olaraq əsas strateji hədəfimiz budur ki, fabriklər yerli tütündən istifadə etsin. Amma onların da xammalın keyfiyyəti ilə bağlı xüsusi tələbləri var, əsasən Virciniya sortuna üstünlük verirlər. Ötən təsərrüfat ilində əkilmiş tütünün 75 %-dən çox dediyim sorta aid olub. Bu da keyfiyyətə doğru ciddi irəliləyişlərdir".

"Tütünçülük ölkəmiz üçün ənənəvi, əmək tutumlu, ixrac yönümlü vacib sahələrdən biridir. Bu sahənin inkişafı ilə bağlı dövlət proqramı qəbul edilib, bu çərçivədə xeyli işlər görülüb. Dövlət tütünçülüyə dəstək verir, fermerlərə məhsul subsidiyası ödəyir və bütün bunlar kompleks şəkildə məhsul istehsalını stimullaşdırır. 2022-ci ildə 11 rayonda tütün əkilib, 5 066 ton məhsul yığılıb, bu da yaxşı göstəricidir. Məhsuldarlıq 21 sentner təşkil edib", - deyə o qeyd edib.

pia.az