Azərbaycan Parisdə keçirilən “Çay şəhərciyi”ndə təmsil olunur

“Report” un Fransa bürosu xəbər verir ki, Kənd Təsərrüfatı Nazirliyinin tabeliyində “Aqrar Tədarük və Təchizat” ASC-nin tədbirdə iştirakı Azərbaycanın Fransadakı səfirliyi, Fransada Azərbaycanın Dostları Assosiasiyası, eləcə də Paris Azərbaycan Evi təşkilatının dəstəyi ilə baş tutub.

“Parisdə çay kəndi” festivalında iştirakın əsas məqsədi Azərbaycan çay mədəniyyətinin, yerli istehsal olan qida məhsullarının, o cümlədən “Kənddən Şəhərə” brendi altında qablaşdırılan Zaqatala çayının ölkədən kənarda tanıdılması və yeni beynəlxalq əlaqələrin yaradılmasıdır.

Parisdə Saint Sulpice meydanında keçirilən beynəlxalq festivalda Zaqatala çayı ilə bərabər digər yerli çay növləri, həmçinin çaya əlavə edilən yerli ədviyyatlar, müxtəlif şirniyyatlar və quru meyvələr sərgilənir. Festivalda Zaqatala çayının və digər ədviyyatlı çayların, qida məhsullarının dequstasiyası da təşkil olunur.

Festival çərçivəsində “Aqrar Tədarük və Təchizat” Açıq Səhmdar Cəmiyyətin nümayəndə heyəti ixrac potensialı böyük olan yerli istehsal məhsulların ixracına dəstək məqsədi ilə müxtəlif görüşlər keçirir. 10-dan çox ölkənin iştirak etdiyi Beynəlxalq Çay Şəhərciyi sentyabrın 29-dək davam edəcək.

pia.az