ABŞ Senatındakı Demokratik Əksəriyyətin lideri Çak Şumer senatorların tətilləri təxirə salmaq və Ukraynaya əlavə yardımın razılaşdırılması üzrə işi davam etdirmək qərarını açıqlayıb...
Poliqon Reuters Agentliyinə istinadən xəbər verir ki, Nümayəndələr Palatası bundan əvvəl bu məsələyə yalnız yanvarda baxılacağını açıqlayıb.
Görüş zamanı Şumer bildirib ki, bugünkü müzakirələrdən sonra Senat bazar ertəsi Ukraynaya yardımın ayrılması məsələsinə qayıdacaq.
“Uğurumuzdan çox şey asılıdır. Biz bilirik ki, dünya bizi izləyir”, deyə Şumer deyib.
Qeyd edək ki, dekabrın 14-də ABŞ Nümayəndələr Palatasının üzvləri milad tətilinə çıxmaq üçün işlərini başa vurublar və tezliklə Senatda iclasını yekunlaşdırmalıdır. Konqresin hər iki palatası 2024-cü il yanvarın 9-da işini bərpa edəcək.
Xatırladaq ki, bir neçə aydır ki, Konqresdə Ukrayna, İsrail və Tayvana maliyyə yardımı verilməsi məsələsi müzakirə olunur. Oktyabr ayında prezident Co Bayden Ukrayna üçün 61,4 milyard, İsrail üçün isə 14,3 milyard dollar yardım ayrılması tələblərini göndərib. Lakin respublikaçılar və demokratlar arasındakı fikir ayrılıqları səbəbindən maliyyə məsələsi 2024-cü ilə qədər təxirə salınır.
Poliqon.info