ABŞ Maduronu hədələyib...

Poliqon xəbər verir ki, bu barədə Dövlət Departamentinin mətbuat xidmətinin rəhbəri Metyu Millerin çərşənbə axşamı dərc olunmuş yazılı bəyanatında deyilir.

“Birləşmiş Ştatlar 33 venesuelalının, o cümlədən demokratik müxalifətin, vətəndaş cəmiyyətinin nümayəndələri, təqaüddə olan hərbçilər və jurnalistlərin həbsinə orderlərin verilməsindən və həbs olunmasından dərin narahatdır”, deyə Amerika xarici siyasət departamentinin nümayəndəsi bildirib.

“Müxalif “Unitar Platforma” və Nikolas Maduronun nümayəndələri tərəfindən 2023-cü ilin oktyabrında imzalanmış seçkiyə hazırlıq sazişlərinin ruhuna uyğun olmayan həbslər əldə olunan razılaşmalarla ziddiyyət təşkil edir. Bu Venesuelalıların demokratik istəklərini qorxu və təhdidlə ilə boğmaq cəhdləridir”, deyə Miller əlavə edib.

ABŞ Dövlət Departamenti qeyd edib ki, Barbadosda imzalanmış sazişin ruhuna və hərfinə zidd olan hərəkətlərin nəticələri olacaq.

“Biz Maduronu və onun nümayəndələrini seçkilərə hazırlıqla bağlı razılaşmaya əməl etməyə, o cümlədən 2024-cü ildə prezident seçkilərinin keçirilməsi üçün dəqiq cədvəlin elan edilməsinə və bütün Venesuelalı siyasi namizədlərin hüquqlarının bərpa olunmasına çağırırıq”, deyə bəyanatda vurğulanır.

Qeyd edək ki, yanvarın 23-də Maduro sağ müxalifəti ölkədə sabitliyi pozmaq və dövlət başçısını, hərbi rəhbərləri və Taçira ştatının qubernatorunu öldürmək planlarının olduğunu elan edib.

2023-cü ilin oktyabrında Barbadosun paytaxtında danışıqlarda Venesuela rəhbərliyi və müxalifət nümayəndələri dialoqun bərpası və 2024-cü ildə Bolivar respublikasında seçki prosesinin təşkili barədə razılığa gəliblər. Sazişlər Venesuelaya və onun institutlarına qarşı istənilən formada siyasi zorakılığın rədd edilməsini, hər bir siyasətçinin öz namizədini sərbəst seçmək hüququnun tanınmasını və seçkilərin bütün iştirakçılarına təminat verilməsini nəzərdə tutur.

Poliqon.info