Kamikadze pilotsuz təyyarənin İraqın Ərbil şəhərindəki ABŞ hərbi bazasını vurmasından sonra ABŞ ordusu İraqdakı “Kataib Hizbullah” yaraqlılarının hədəflərinə cavab zərbələri endirib...
Poliqon xəbər verir ki, bu barədə euters Agentiliyinin məlumatında bildirilir. Agentliyin məlumatına görə, ABŞ hərbi bazasına hücum zamanı 3 əsgər yaralanıb, onlardan birinin vəziyyəti ağırdır.
“Bu zərbələr İraq və Suriyada koalisiya qüvvələrinə qarşı hücumlara görə bilavasitə məsul olan elementləri məsuliyyətə cəlb etmək və onların hücumları davam etdirmək imkanlarını azaltmaq üçün nəzərdə tutulub”, deyə ABŞ Mərkəzi Komandanlığının rəhbəri general Maykl Erik Kurilla deyib.
Reuters məlumatında ABŞ ordusunun “Kataib Hizbullah”ın bir neçə obyektini məhv etməyə müvəffəq olduğu bildirilir.
Pentaqon yaralanan hərbçilərin adlarını və onların xəsarətlərinin təfərrüatlarını açıqlamayıb.
“Mən yaralanan cəsur amerikalılar üçün dua edirəm”, deyə ABŞ-ın müdafiə naziri Lloyd Ostin Amerika Müdafiə Nazirliyinin saytında yazıb.
Dekabrın 25-də İraq Silahlı Qüvvələrinin Ali Baş Komandanının rəsmi nümayəndəsi Yəhya Rəsul İraq Kürdüstanının Ərbil hava limanı yaxınlığında ABŞ hərbi bazasına zərbə endirdiyini açıqlayıb.
Poliqon.info