12,8 min il əvvəl Suriyada nə baş verib? - Həyatı dəyişən partlayış

Poliqon xəbər verir ki, bu qənaətə ABŞ və Böyük Britaniyadan olan beynəlxalq alimlər qrupu gəlib. Tədqiqat "Airbursts and Cratering Impacts" (ACI) elmi jurnalında dərc olunub.

Ölkənin şimalında Əbu Hureyra qədim yaşayış məskəninin qalıqlarının yeni təhlilinə əsasən, kometanın təsiri həyat tərzində ovçuluqdan əkinçilik və vəhşi heyvanların əhliləşdirilməsinə kəskin dəyişməyə səbəb olub.

Alimlərin fikrincə, 12,8 min il əvvəl Yer atmosferinə təxminən 100 km enində buz bloku daxil olub. Səma cismi kentavrlar sinfinə - asteroidlərin və kometaların xüsusiyyətlərini birləşdirən obyektlərə aiddir. Parçalanmış kentavrın parçalarından biri atmosferdə partlayaraq, Əbu Hureyrəni və onun sakinlərini şok dalğası ilə məhv edib.

“Mövcud sübutlara əsaslansaq, bu, kosmik təsir nəticəsində fəlakətli şəkildə zədələnmiş insan məskəninin ən erkən nümunəsidir”, deyə elmi məqalədə qeyd edilir.

Kentavrın partlaması günəş işığının qarşısını alan və soyuq havaya səbəb olan sıx toz buludları yaradıb.

Tədqiqat göstərir ki, kometa vurmazdan əvvəl məskunlaşanlar əsasən yabanı meyvələr, giləmeyvə və paxlalılar yeyib, fəlakətdən sonra isə onların qidası becərilən taxıl və mərciməyə keçib. Bölgədə quraqlığa davamlı bitkilərin becərilməsində də artım müşahidə olunub.

Poliqon.info