Vaşinqtonun mənbələri Surovikinin azad olunduğunu təsdiqləyib…

Poliqon xəbər verir ki, bu barədə The New York Times qəzeti iki amerikalı məmura və Rusiya Müdafiə Nazirliyinə yaxın bir şəxsə istinadən yazır.

Qeyd edək ki, bir gün əvvəl jurnalist Kseniya Sobçak Surovikinin həyat yoldaşı ilə fotosunu dərc edib.

Vaşinqtondakı mənbə qəzetə bildirib ki, Surovikinin azadlığa buraxılmasına baxmayaraq, ona qarşı hər hansı məhdudiyyətin, o cümlədən hərəkət məhdudiyyətinin qoyulub-qoyulmadığı hələ də aydın deyil.

Nəşrin Müdafiə Nazirliyinə yaxın mənbənin sözlərinə görə, Surovikin avqustun 23-də Yevgeni Priqojinin təyyarə qəzasından bir neçə gün sonra azad edilib. Mənbə qeyd edib ki, general rütbəsini qoruyub saxlasa da, artıq orduda karyera perspektivi yoxdur.

Dünən Soçidə Putin və Ərdoğan görüşündə jurnalistlər Rusiyanın müdafiə naziri Sergey Şoyquya Surovikin haqqında sual verib. Şoyqu sualı cavablandırmasa da, bundan qısa müddət sonra Kseniya Sobçak, bazar ertəsi çəkilmiş və Surovikinin həyat yoldaşı ilə gəzdiyini əks etdirən fotonu yayımlayıb. Həmçinin axşam saatlarında “Exo Moskva” radiostansiyasının keçmiş baş redaktörü Aleksey Venediktov “Surovikinin ailəsi ilə birlikdə evində olduğunu” yazıb. Jurnalist Fəridə Rüstəmova qeyd edib ki, Sobçak fotonu jurnalistlərin müdafiə naziri Sergey Şoyqudan Surovikinlə bağlı sualından yarım saat sonra dərc edib.

Surovikin son dəfə Yevgeni Priqojinin üsyan etdiyi gecə “Vaqner”ə videomüraciət yazaraq ictimaiyyət qarşısında çıxış edib. The New York Times və The Wall Street Journal qəzetləri Qərb kəşfiyyat mənbələrinə istinadən yazıblar ki, general Priqojinin üsyanı barədə çox güman ki, əvvəlcədən xəbər tutub. Az sonra telegram kanallarında və Qərb mediasında Surovikinin saxlanması ilə bağlı xəbərlər peyda olub. Eyni zamanda bəzi KİV-lər, o cümlədən Bloomberg və Important Stories onun dindirildiyini, lakin həbs olunmadığını yazıb. The Moscow Times nəşrinin rus xidməti generalın həbs olunduğunu bildirib.

Poliqon.info