Məhkəmə İctimai Təşəbbüslər Mərkəzinin və mərkəzin rəhbəri, iqtisadçı ekspert Qubad İbadoğlunun şəxsi bank hesablarına həbs qoyub
Avqustun 29-da “Media forum” saytına açıqlama verən Qubad İbadoğlu deyib ki, Səbayel Rayon Məhkəməsi İctimai Təşəbbüslər Mərkəzinin “Bank Respublika”da olan hesabına, Nəsimi Rayon Məhkəməsi isə Beynəlxalq Bankda yerləşən şəxsi hesablarına həbs qoyub:
“Həbs prokurorluğun təqdimatı əsasında gerçəkləşib. Amma bizə qarşı belə bir iddianın qaldırıldığı və məhkəmənin işə baxacağı haqda əvvəldən məlumatımız olmayıb, xəbərdarlıq almamışıq. Məhkəmələr iddiaya bizim iştirakımız olmadan baxaraq qərar verib, qərarları da almamışıq. Bir dəfə məhkəmələrə getmişik, ala bilməmişik.
Qərarları əldə edən kimi apellyasiya şikayəti verəcəyik. Hələlik bank hesablarına hansı səbəbdən həbs qoyulduğu bizə bəlli deyil”.
Müsavat Divanının üzvü, bu partiyanın başqanlığına iddiaçı, İqtisadi Tədqiqatlar Mərkəzinin rəhbəri Qubad İbadoğlu avqustun 28-də Baş Prokurorluğa çağırılıb. İqtisadçı-alimi orada 6 saat ərzində dindiriblər.
“Yeni Müsavat” qəzetinə geniş müsahibə verən Q.İbadoğlu bu barədə və eyni zamanda Müsavat başqanlığına iddiaçı olaraq, şansları, fəaliyyət proqramı barədə danışıb.
Həm istintaqda, həm də başqanlıq yarışında geniş ictimaiyyətə bəlli olmayan sensasion məqamları qəzetlə bölüşən Q.İbadoğlu hər an hər şey ola biləcəyini deyib. İqtisadçı-alimin verdiyi müsahibədən belə anlaşılır ki, istintaq son QHT işini Azərbaycana qarşı “Qərbin inqilab ssenarisinin” sanki deşifrəsi xarakterində aparır.
Bundan başqa, Q.İbadoğlu opponentlərinə münasibətini də açıq şəkildə ifadə edib. İqtisadçı donor təşkilatların və Qərb ölkələri paytaxtlarının “QHT işi” ilə bağlı göstərdiyi və geniş ictimaiyyətə bəlli olmayan fəaliyyətləri də açıqlayıb. O, Qərb ölkələrini təmsil edən səfirlərin Bakıda keçirdiyi 3 saatlıq toplantı haqda da bilgilər verib...