Milli Şuranın sonuncu qapalı toplantısı ilə əlaqədar şok video-parça yayılıb. Qurumun rəhbərliyində təmsil olunan şəxslər bu dəfə də üz-üzə gəldikləri ictimai-siyasi statusu olan şəxslərə qarşı təhqiramiz ifadələr səsləndiriblər. Onların növbəti təhqir hədəfinə çevrilənlər "Turan" agentliyinin rəhbəri Mehman Əliyevi və REAL partiyasının liderlərindən olan Natiq Cəfərli olub.
REAL Partiyasının sədr müavini Natiq Cəfərli məsələ ilə bağlı Yenisabah.az-a açıqlamasında bildirib ki, bu məsələyə geniş cavab vermək istəmir. Çünki o səviyyəyə düşməyi özünə ayıb sayır:
“Onlara cavab verdikcə insan onların səviyyəsinə düşür. Cəmiyyət hər şeyi görür, cəmiyyətin və ictimaiyyətin gördüklərindən nəticə çıxarması mənim cavab verməyimdən daha önəmlidir. Bunun hücum serialının neçənci seriyası olduğunu artıq unutmuşam. Hər birində insanların təhqir olunması, aşağılanması o təşkilatın nə qədər marginal olduğunu, hansı səviyyənin daşıyıcısı olduğunu göstərir. Ona görə də cəmiyyətin bu məsələ ilə bağlı fikrinin formalaşması geniş cavab verməkdən daha önəmlidir. Mən əminəm ki, bu, fikir artıq formalaşıb. Onlar ,əsasən, xaricdə məskunlaşmış və Azərbaycan reallıqlarından tamamilə bixəbər olan bir qrupdurlar. Mənim üçün bu mövzu bağlanıb”.
pia.az