Moldova vətəndaşlarının demək olar ki, yarısı Rusiyanı ölkənin təhlükəsizliyinə təhdid hesab edir...
Sorğuda iştirak edən Moldova vətəndaşlarının demək olar ki, yarısı Rusiyanı ölkənin təhlükəsizliyinə təhdid hesab edir.
Poliqon xəbər verir ki, bu barədə “NewsMaker” məlumatında bildirilir. Portal yazır ki, bu, “WatchDog.MD”nin sifarişi ilə “CBS Research” tərəfindən keçirilən ictimai rəy sorğusunun nəticəsidir.
Sorğunun nəticələrinə görə, respondentlərin 48,1%-i Rusiyanı Moldovanın təhlükəsizliyinə təhdid kimi görür. Respondentlərin isə 43,9%-i əks fikirdədir. Tədqiqat iştirakçılarının daha 8%-i cavab verməkdə çətinlik çəkib.
Bundan əvvəl keçirilən rəy sorğusunda isə müvafiq məsələnin referenduma çıxarılacağı təqdirdə Moldova vətəndaşlarının əksəriyyətinin Avropa İttifaqına (Aİ) üzv olmağa səs verəcəyi bildirilirdi. Rəy sorğusundan belə çıxır ki, Aİ-yə üzvlüklə bağlı referendum keçirilsəydi, respondentlərin 56%-dən çoxu Moldovanın Aİ-yə üzv olmasına səs verəcək. Respondentlərin 25%-i isə əleyhinə səs verəcək.
Poliqon.info