ABŞ Strateji Komandanlığının komandanı general Entoni Kotton bildirib ki, yaxın 10 il ərzində Rusiya və Çin nüvə silahlarının sayına görə Amerikanı ötə bilər...
Poliqon xəbər verir ki, general bu barədə ABŞ Senatının Silahlı Qüvvələr Komitəsinin dinləmələrində deyib.
Pnun sözlərinə görə, Rusiya və Çində nüvə silahlarının heyrətləndirici dərəcədə sürətli inkişafını nəzərə alsaq, 2035-ci ilə qədər onların döyüş başlıqlarının ümumi sayı hətta Amerika ehtiyatlarını keçə bilər.
Generalın fikrincə, Çin quruda yerləşən nüvə silahlarında da ABŞ-la paritetə nail olacaq. Komandirin sözlərinə görə, Şimali Koreya və İranın bu sahədə səyləri və ambisiyaları ABŞ-ın strateji hesablamalarına yeni mürəkkəblik ölçüsü əlavə edir.
Bununla əlaqədar, Kotton Amerika nüvə silah sistemlərinin sürətli modernləşdirilməsinin davam etdirilməsinin zəruriliyini qeyd edib, lakin ABŞ-ın strateji nüvə qüvvələrinin bu gün döyüşməyə hazır olduğunu deyib.
Qeyd edək ki, 2023-cü ildə, fevralın 21-də Rusiya parlamentində çıxışı zamanı Vladimir Putin Rusiyanın strateji nüvə silahları müqaviləsində iştirakını dayandırmaq qərarını açıqlayıb. Bu müqavilə nüvə silahının istehsalına məhdudiyyətlər nəzərdə tuturdu, ABŞ və Rusiyanın nüvə arsenallarının qarşılıqlı təftiş mexanizmini tətbiq edirdi.
Daha sonra Dövlət Departamenti cavab verib ki, ABŞ nüvə arsenalını artırmağı planlaşdırmır və Rusiyanın da buna qadir olduğunu düşünmür. Vaşinqton nüvə arsenallarının qarşılıqlı təftişinin adi rejiminə qayıtmaq istəyir.
Qlobal nüvə müharibəsi riski fonunda Birləşmiş Millətlər Təşkilatının baş katibi Antonio Quterreş dünya ölkələrini məhvedici qurğuların - nüvə silahlarının tarix kitablarından birdəfəlik silinməsi üçün birgə fəaliyyət göstərməyə çağırıb.
Poliqon.info