Britaniya Ukraynanı NATO-ya üzvlük məsələsində sürətli irəliləyiş gözləməməyə çağırıb...
Ukrayna hələlik NATO-ya üzvlüklə bağlı böyük irəliləyiş gözləməməlidir.
Poliqon xəbər verir ki, bunu Böyük Britaniyanın NATO-dakı səfiri Devid Quarri deyib. Diplomat bu barədə "Politico"ya danışıb.
Onun sözlərinə görə, hərbi Alyansın üzvləri iyulun 9-dan 11-dək ABŞ-ın paytaxtı Vaşinqtonda keçiriləcək sammitdə bir araya gələcəklər. Səfir qeyd edib ki, Ukraynanın NATO-ya üzvlüyü məsələsi böyük ehtimalla müzakirə olunacaq, lakin Kiyev gözləntilərini yumşaltmalıdır.
Eyni zamanda, Devid Quarri bildirib ki, Böyük Britaniya Ukraynanın layiqli yerinin NATO-da olduğuna tam əmindir.
"Bizim işimiz Ukrayna ittifaqa yaxınlaşdığı üçün onu dəstəkləməyə davam etməkdir. Lakin sürətli irəliləyiş gözləmək olmaz. Hər şeyin zamanı var", deyə Devid Quarri bildirib.
"Politico" qeyd edib ki, NATO müttəfiqləri uzun müddətdir Ukraynanın üzvlük iddiasını dəstəklədiklərini ifadə ediblər, lakin indiyədək Alyansa qoşulmaq üçün dəqiq vaxt cədvəli təklif edə bilməyiblər.
Poliqon.info